Pas 56 vjetësh thyhet rekordi i Peles në Kampionatin Botëror
Anglia e mposhti Francën me rezultat spektakolar 6:4 në ndeshjen për vendin e tretë të Kampionatit Botëror në Miami dhe fitoi medaljen e bronztë.
Anglezët kryesonin 4:0 pas pjesës së parë, por Franca u rikthye në 4:3 dhe pati disa mundësi të pastra për ta përmbysur plotësisht rezultatin.
Heroi i ndeshjes ishte Bukayo Saka, i cili realizoi tre gola për Anglinë. Golat e tjerë u shënuan nga Declan Rice, Jude Bellingham dhe Ezri Konsa.
Kylian Mbappé shënoi dy gola për Francën dhe, me gjithsej 22 realizime, u bë golashënuesi më i mirë në historinë e Kampionateve Botërore, me një gol më shumë se Lionel Messi. Mbappé asistoi edhe për Bradley Barcolan, ndërsa për Francën shënoi edhe Ousmane Dembélé.
Michael Olise vendosi një rekord të ri në historinë e Kampionateve Botërore. Me dy asistimet e tjera për Mbappén, mesfushori francez arriti në gjithsej tetë asistime në këtë turne.
Në këtë mënyrë, ai e tejkaloi rekordin e Peles, i cili kishte regjistruar gjashtë asistime në Botërorin e vitit 1970 në Meksikë, dhe u bë asistuesi më i mirë brenda një edicioni të Kampionatit Botëror, shkruan “Marca”.
Olises tani i mungojnë edhe katër asistime për ta barazuar rekordin e Lionel Messit, i cili mban rekordin absolut për numrin më të madh të asistimeve në historinë e Botërorëve. Duke marrë parasysh se në turneun e vitit 2030 do të jetë 28 vjeç, francezi mund të synojë ta thyejë edhe këtë rekord.
Olise zhvilloi një turne të shkëlqyer, duke treguar vizion të jashtëzakonshëm dhe bashkëpunim të mirë me Mbappén, të cilin vazhdimisht e gjente në zonën e rreptësisë.
E ardhmja e futbollistit të Bayern Munichut vazhdon të jetë e pasigurt, ndërsa Real Madridi raportohet se është i interesuar për transferimin e tij. Tifozët madrilenë shpresojnë që dyshja Olise–Mbappé të luajë së bashku edhe në fanellën e klubit spanjoll.
Ata treguan harmoni të veçantë gjatë gjithë Kampionatit Botëror. Me dy asistimet e fundit, Olise theu rekordin 56-vjeçar të Peles, ndërsa Mbappé vendosi rekord historik me 22 gola në Botëror. / Aktuale.mk
