Gjatë javës së kaluar janë mënjanuar 218 automjete nga sipërfaqet publike me automjetet speciale “karrotrec”, kumtoi Qyteti i Shkupit.
Nga numri i tërësishëm i automjeteve të parkuara në mënyrë të paligjshme, 36 janë mënjanuar nga vendparkimet zonale, ndërsa 182 automjete tjera me urdhëresë të policisë së komunikacionit në bazë të shkeljeve të bëra – parkim në rrugë, shteg të çiklistëve, trotuar, sipërfaqe të gjelbërt, në kundërshtim me shenjat e komunikacionit si dhe me thirrje nga personi i tretë.
“Kontrolluesit e vendparkimeve zonale në periudhën e njëjtë kanë sanksionuar gjithsej 352 automjete, për shkak të parkimit të parregullt, përkatësisht për shërbim të papaguar të parkingut. Prej tyre, 36 automjete janë mënjanuar me shërbimin e “karrotrecit” për shkak të tejkalimit të kohës së vendparkimit”, thuhet në kumtesë.
Qyteti i Shkupit dhe ndërmarrja publike “Parkingu i qytetit” apelojnë te qytetarët ta ruajnë gjelbërimin dhe sipërfaqet tjera publike, ndërsa automjetet e tyre t’i parkojnë vetëm në vendparkimet e shënuara.
“Apelojmë të gjithë shfrytëzuesit e shërbimeve për parkim, në kohë ta regullojnë pagesën për parking-shërbim, që të mos sanksionohen dhe të mos u vendoset bllokues në gomë. Pagesa për shërbim të parkimit mund të bëhet përmes SMS porosisë ose me kartelë gërvishtëse”, shtojnë nga Qyteti i Shkupit.
