Kryeministri bullgar Kirill Petkov, ka folur në lidhje me vendimin e Kuvendit të Bullgarisë, i cili i ka dhënë dritë jeshile propozimit francez për kontestin me Maqedoninë e Veriut.
Petkov në një postim në Facebook ka shkruar se Kuvendi i Bullgarisë sot ka sjellë vendim historik, përcjell Telegrafi Maqedoni.
“Parlamenti bullgar sot miratoi një vendim historik që i jep dritë jeshile propozimit francez për anëtarësimin e Maqedonisë së Veriut në Bashkimin Evropian. Integrimi i Ballkanit Perëndimor është me interes strategjik për Bashkimin Evropian”, ka shkruar Petkov pas votimit në Asamblenë Kombëtare Bullgare që miratoi propozimin francez për Maqedoninë e Veriut.
Sipas këtij vendimi, Kuvendi i jep të drejtë Qeverisë në dorëheqje të Petkovit të miratojë kornizën negociuese dhe përfundimet e propozuara nga kryesimi francez me BE-në për zgjidhjen e kontestit në mes Shkupit dhe Sofjes, nëse plotësohen kushtet.
“Zbatimi efektiv i Marrëveshjes për fqinjësi të mirë, garantimi i të drejtave të bullgarëve në Republikën e Maqedonisë së Veriut përmes futjes së tyre në Kushtetutë, asgjë në procesin e anëtarësimit të RMV nuk duhet të interpretohet si njohje e gjuhës maqedonase nga Bullgaria dhe garancë nga BE se e gjithë kjo do të përmbushet”, janë kushtet e vendosura nga Sofja.
