Prokuroria Themelore Publike (PTHP) Koçan pas marrjes së dokumentacionit zyrtar për vdekjen e Aleksandar Karadakoskit, menaxher i diskotekës Pulse nga Koçani, do të lëshojë urdhër për ndërprerjen e hetimeve ndaj tij, njoftuan nga prokuroria pasi më herët sot ministri i Shëndetësisë, Arben Taravari, konfirmoi se Karadakoski vdiq në një spital në Lituani dhe se ai është viktima e 60-të e tragjedisë së Koçanit.
“Duke marrë parasysh se viktima e 60-të e sotme nga zjarri katastrofik në Koçan është një person i cili paraprakisht ka qenë i përfshirë me urdhër për zhvillimin e procedurës hetimore, në cilësinë e menaxherit të personit juridik, Prokuroria Themelore Publike Koçan, pas marrjes së dokumentacionit zyrtar për shkakun e vdekjes, do të lëshojë urdhër për ndalimin e procedurës hetimore nga prokuroria e shtetit.
Kolegjiumi profesional i Prokurorisë Publike sot ka mbajtur mbledhje në përbërje të zgjeruar dhe me një minutë heshtje në shenjë respekti për viktimat e tragjedisë në diskotekën Pulse në Koçan, ku janë prezantuar veprimet e deritanishme, mënyra dhe koncepti i hulumtimit dhe aspektet profesionale të rastit që prokurorët kanë parasysh gjatë hulumtimit.
Në zjarrin katastrofik që përfshiu diskotekën Pulse në Koçan më 16 mars të këtij viti, humbën jetën 60 të rinj dhe rreth 200 u lënduan.
