Drejtor i Ndërmarrjes Publike “Higjiena Komunale”, Sabahudin Rustemi i është përgjigjur akuzave të kreut të komunës së Çairit, përcjell TV21. Rustemi thotë se është konfiskuar kamioni që kishte angazhuar komuna për mbledhje të mbeturinave jashtë kontejnerëve, pasi paraprakisht komuna nuk ka caktuar me marrëveshje se ku do t’i deponojë mbeturinat e mbledhura.
Në lidhje me: Ganiu: Kanë ardhur me polici dhe duan ta konfiskojnë kamionin për mbledhje të mbeturinave! Ishin 530 kontejnerë, tani ka vetëm 320
“Visar Ganiu ka sulmuar vazhdimisht ndërmarrjen publike Higjiena Komunale, dhe në skandalin e fundit që shkaktoi me hedhjen e paligjshme të mbeturinave dhe mbledhjen e mbeturinave, automjeti i tij u konfiskua nga Ministria e Brendshme. Ganiu duhet të tregojë se ku i hedh mbeturinat që mbledh, sepse nuk ka kontratë me të vetmen deponi sanitare, Drisla. E pyesim publikisht Kryetarin e Komunës së Çairit Visar Ganiu se ku i hedh mbeturinat që mbledh? Meqenëse nuk i hedh në Drisla, a krijon Ganiu deponi të paligjshme me mbeturinat, duke helmuar qytetarët e Shkupit?”, thotë Rustemi në përgjigje për TV21.
