Ndonëse në Ministrinë e Shëndetësisë në periudhën e kaluar u ndërruan disa ministra, çështjet e hapura të punëtorëve shëndetësorë lidhur me pagat dhe statusin e tyre mbetën të zgjidhura. Nga Sindikata e këtij sektori u shprehën të revoltuar sepse një herë u ishte thënë se do të ketë rritje të pagave dhe pastaj se nuk do të ketë. Paraprakisht zëvendësministrja Maja Manoleva kishte paralajmëruar se do të ketë rritje lineare të pagave dhe më pas ministri i ri Ilir Demiri u tha se nuk do të ketë rritje të pagave. Nga Sindikata thonë se nëse mbeten me të njëjtat paga, ato do të jenë më të ulëta edhe nga pagat e të punësuarve me kompleksitetin më të ulët të punës. Kjo ndodh sepse kontratat kolektive nuk janë në përputhje me ligjin për pagën minimale. Nëse rroga e marsit mbetet e njëjtë, ata paralajmërojnë protesta.
“Pra do të ndodhin anomali të tilla që punonjësit e shëndetësisë, personeli shëndetësor me shkollë të mesme profesionale kanë pagë më të ulët se punonjësit me kompleksitetin më të ulët të punës, pra me koeficientin 1. Kemi tre opsione. Protesta gjatë pauzës, opsioni i dytë, mbyllja e poliklinikave dhe objekteve shëndetësore publike dhe spitaleve nga ora 11:00 deri në 14:00 dhe opsioni i tretë është greva e përgjithshme”, theksoi Bobi Bojçevski, Sindikata e Pavarur e Punëtorëve Shëndetësorë .
Përveç pagave të ulëta, punonjësit e shëndetësisë përballen edhe me statusin e tyre, pra një pjesë e madhe e tyre me vite të tëra punojnë pa vendim e një pjesë edhe pa marrëveshje në vepër.
“Problemi është shumëvjeçar, madje ka njerëz që punojnë 13 vjet ndërsa statusi i tyre nuk është zgjidhur, gjë që është shumë e mjerueshme për çdo profesion, e të mos flasim për profesionet e shëndetësisë. Gjithashtu, për shkak të mungesës shumë të madhe të personelit, kjo do të ndikojë në pjesën tjetër të personelit që tashmë është me kontratë për periudhë të pacaktuar, sepse përgjegjësitë e punës ndahen nga fakti që punojmë një për tre”, theksoi Kristina Olevska, Sindikata e Pavarur e Spitalit të Përgjithshëm “8 Shtatori”.
Për zgjidhjen e statusit të punëtorëve shëndetësorë, ministri i mëparshëm Fatmir Mexhiti para Vitit të Ri paralajmëroi se mbi një mijë të punësuar me kontratë në vepër do të marrin punësim të përhershëm, por për momentin ende nuk ka asgjë.
