Jemi kthyer nga pushimet dhe ndihemi më të lodhur sesa kur u larguam. Ndonjëherë është një ndjesi mendore, e lidhur me trishtimin që dikush kthehet në detyrat e përditshme pas një pauze që, ndoshta, ishte shumë e shkurtër. Ndryshimi i sezonit që ne fillojmë ta perceptojmë në ajër ka peshën e tij, ashtu si edhe nevoja për të riklimatizuar veten në mjedisin e qytetit. Sidoqoftë është e mundur që mënyra jonë e jetesës është tepër e ngutshme: në këtë rast trupi ynë na e sinjalizon këtë përmes një shqetësimi të përgjithshëm i cili duhet të dëgjohet.
Këtu kemi një sërë masash paraprake që duhet, t’i vëmë në praktikë:
Ngadalësoni ritmin– Duket si një gjë e parëndësishme, por gjëja e parë që duhet të bëni kur ndiheni të lodhur është: pushimi. Le të kontrollojmë ditët tona dhe të përpiqemi të përcaktojmë se çfarë është e gabuar: nëse zbulojmë se, në pak ditë nga momenti i kthimit, ne kemi shpaketuar, larë dhe vendosur të gjithë veshjet e verës, kemi pastruar shtëpinë dhe kemi bërë gjithë punët e prapambetura në zyrë, nuk ka dyshim që kemi kërkuar shumë nga vetja. Shpejtësitë janë të mira në Formula 1, por nuk janë fitimprurëse për njerëzit e thjeshtë. Mbetet vetëm të ngadalësojmë ritmin, duke planifikuar aktivitete të ndryshme. Le të përpiqemi të organizojmë ditët duke filluar nga një lloj numërimi mbrapsht: para së gjithash ne planifikojmë një hapësirë për veten tonë, duke përmbysur rregullin e “së pari detyra, pastaj …”. Pas fiksimit të një kuote të vogël, por të arsyeshme për atë që na pëlqen ose për të mos bërë asgjë, ne e ndajmë kohën e mbetur midis aktiviteteve të ndryshme.
Caktoni prioritetet – Duke organizuar agjendën e ditës, ne caktojmë një shkallë përparësie të gjërave për të bërë: duke caktuar një kod të kuq për aktivitete shumë urgjente, një kod të verdhë për ato që do ishte mirë të mbylleshin brenda ditës dhe një kod të gjelbër për atë që do ta bëjmë nëse gjejmë kohë. A është gjithçka me nevojë urgjente? Le ta lexojmë përsëri listën dhe ta pyesim veten me një mendje më të qetë: sigurisht që shumë detyra mund të ulen nga urgjenca e kuqe në të verdhë. Ende shumë kode të kuqe? Mbetet vetëm të kërkojmë përforcime. Është e ndaluar të sakrifikojmë kohën që i kemi rezervuar vetes.
Flini mjaftueshëm – Kthimi në shtëpi dhe ndryshimi i rutinës mund të ketë efekte negative në cilësinë e gjumit. Pra, le të sigurohemi që të flemë mjaftueshëm: kalimi nga gjumi i gjatë për pushime në netë të shkurtra dhe të shqetësuara në të cilat ju pushoni pak dhe keq ka, natyrisht, efekte negative në mirëqenien e ditës. Nëse alarmi bie herët në mëngjes, ne nuk mund të qëndrojmë deri vonë me miqtë për t’u treguar aventurat e pushimeve, ose para kompjuterit për të ndarë albumet e fotove të verës. Caktojini vetes një afat kohor brenda të cilit të jeni në shtrat dhe mos harroni se drita blu e lëshuar nga pajisjet elektronike ndryshon nivelet e melatoninës, hormonit të gjumit, me efekte negative në cilësinë e gjumit. Më mirë fikni gjithçka disa orë para se të fikni dritën.
Hidratohuni – Jo të gjithë e dinë që lodhja e përgjithshme është një nga simptomat e dehidrimit. Le të sigurohemi që pimë mjaftueshëm: dy litra në ditë (e barabartë me rreth tetë gota) të rekomanduara për të gjithë të rriturit e shëndetshëm, janë gjithmonë një pikë e mirë referimi. Për ta kujtuar këtë zakon të shëndetshëm, le të vendosim një shishe plotë në tryezën tonë të punës dhe të sigurohemi që ta zbrazim atë gjatë gjithë ditës.
Kundërvënia ndaj efektit të vjeshtës – Pjesërisht, sikleti dhe ndjenja e lodhjes mund të varen nga faktorë sezonalë: ditët shkurtohen, temperaturat bëhen më të ftohta dhe dalëngadalë natyra fillon të përgatitet për qetësinë e vjeshtës. Ky është një fakt për të cilin nuk ka zgjidhje dhe që cili duhet të mbështetet. Për ta kundërshtuar atë, mund të jetë një ide e mirë të shfrytëzoni në maksimum ditët e fundit për të qëndruar sa më gjatë jashtë, të ekspozoheni në diell dhe të merreni me disa aktivitete të këndshme që mbajnë gjallë kujtimin e pushimeve.
Le të mbrojmë ngjyrën – Ngjyra e bukur e verës është një ilaç i vërtetë për një humor të mirë. Le të përpiqemi ta mbajmë sa më gjatë që të jetë e mundur, duke e mbajtur lëkurën të hidratuar dhe duke e fshirë lëkurën me një peshqir pa e fërkuar shumë. Idealja është që të vazhdoni të bëni banjo dielli, të ecni jashtë dhe, mbase, të bëni një banjë dielli në tarracën e shtëpisë, siç bëmë gjatë periudhës së izolimit. Pra, nëse kemi mundësi zgjidhja më e mirë është që të planifikojmë një fundjavë tjetër ose disa të diela jashtë qytetit, në det ose në mal: një projekt i këndshëm dhe një mini-pushim do të na përmirësojë humorin dhe do ta bëjë më të lehtë kthimi në ritmet ditore.
