Nga 21 janari SHA EMV do të marrë menaxhimin me BEG dhe ngrohtoren Shkup-Veri, për të cilën u vendos në seancën qeveritare, informoi ministri i ekonomisë, Kreshnik Bekteshi. Qeveria shpalli gjendje krize në sektorin për furnizim me energji termike, por ende nuk dihet se sa do t’i kushtoj shtetit kjo situatë. Bekteshi tha se për momentin kanë në disponim 6 milion euro, por se sa para duhen, do të varet nga çmimet e gazit në periudhën e ardhshme.
“Llogaritjet për 6 milionë eurot janë bërë me çmimet në bursë të gazit natyror për muajin janar. Tani presim ofertat për muajin shkurt dhe mars, sipas atyre projeksioneve do të bëhen përllogaritjet, por ta dijë opinioni se ne nuk subvencionojmë kompanitë private dhe për këtë ka vendim që EMV të marrë përsipër dhe ne në ndihmë të qytetarëve do të dalim përmes EMV-së, e jo përmes BEG-ut.”,- tha ministri i ekonomisë, Kreshnik Bekteshi.
