Analisti politik, Vigan Qorrolli, ka thënë se e diela e zgjedhjeve ka qenë shumë dinamike me një rezultat të pritshëm.
Ai thotë se ky rezultat ishte nga një revoltë e akumuluar e qytetarëve të Kosovës, të cilët ishin të interesuar për ndryshim.
Qorrolli në Interaktiv të KTV-së ka thënë se skandalet e akumuluara nga qeveritë të cilat tregonin kauzë vetëm personale e jo për komunitetin, prodhoi pasojë që opozita të fitojë zgjedhjet.
“Populli u tregua shumë syçelë dhe ky është revolucion i shpresës për Kurtin por edhe për të tjerët. Të gjithë tjerët mund të quhen humbës sepse në maratonë vetëm një fitues ka. VV ka kërkuar votën në deklarimin e çkapjes së shtetit dhe ky revolucion i shpresës mund të thuhet se duhet ta ketë një formulë të qëndrueshme dhe kjo është çkapja e shtetit. Kemi institucione publike qe janë të kapura nga një ‘milici politike’, kemi universitete pa strategji të mirëfilltë”, ka thënë ai.
Ai tutje ka shtuar se katër ditë nga dita e zgjedhjeve, LDK ishte prijëse e sondazheve. Sipas tij, Osmani u varfërua duke ndërtuar kështu fushatë kundër PAN-it e Kadri Veselit.
“Osmani nuk arriti të tregohet e mençur politikisht sepse nuk arriti t’i tregojë elektoratit zgjidhjet për problemet e shumta. Vetëvendosja u tregua e mençur, ajo derisa sulmonte kundërshtarët tregonte edhe programin politik”, ka thënë ai.
Ai tutje ka shtuar se edhe diaspora ka luajtur rol të rëndësishëm, duke thënë se mund të jetë përcaktuese e fatit politik.
Sipas Qorrollit ato vota mund t’i rrisin mandatet e partive. Ai thotë se në të premten kur ishte edhe dita e fundit e fushatës, u pa që Vetëvendosje do të dilte e para.
Bastionet si Gjilani dhe qytetet tjera që udhëhiqeshin nga LDK-ja, Vetëvendosje arriti t’i merrte me njerëz jo të njohur, thotë ndër të tjera Qorrolli.
Duke folur për koalicionin me LDK, ai ka thënë se “meqenëse VV është e para, besoj që mund të jetë e mundshme të ndryshoj situatën politike të Kosovës. Kurti duket se ka treguar një vullnet ta ftojë LDK-në ndonëse negociatat pritet t’i zhvillojnë Mustafa e Haziri. Do të ulën në tavolinë, do të flasin për ndarjen e tortës, por besoj që më e rëndësishme se kjo duhet të flasin për tema të tjera, si dialogu temë e cila është patate e nxehtë”, ka thënë ai.
Qorrolli tutje ka thënë se Kurti do ta ketë të panegociueshme pozitën e kryeministrit në një koalicion me LDK-në. Sipas tij, çështje e negociatave mund të jetë pozita e kryeparlamentarit, por edhe ajo e presidentit, që i skadon mandati më 2021.
Sipas tij, VV-ja nuk do të lejojë negocimin për ndarje të bordeve apo institucioneve të pavarura.
Duke komentuar humbësit e zgjedhjeve, ai ka thënë se për PDK-në kjo ishte “pushim i merituar”.
“Nuk ka pasur motiv PDK-ja e as elektorati i saj, e as njerëzit që i ka shpërblyer rregullisht në këto vjet pushteti sepse ata janë shteruar në qeverisje dhe oferta e tyre ndonëse ishte e vonshme për korrupsionin dhe nepotizmin, shihej si e pasinqertë për qytetarin duke ditur se janë hisedarë të instalimit të korrupsionit. Skandalet më të mëdha në qeveritë e pasluftës ndodhën në kohë të tyre. Ishte e pasinqertë e qytetari nuk e bleu. Pavarësisht përpjekjeve për figura të reja, apo largimin e atyre të përfshirë në aferën “Pronto” dhe prurjeve, s’arriti të bindë qytetarët”, ka thënë ai duke shtuar se duhet vlerësuar gjesti i Veselit që menjëherë pranoi humbjen.
Për rënien e AAK-së dhe koalicionit me PSD-në, ai ka thënë se kryetari i AAK-së, Ramush Haradinaj, u bë “kurban i taksës”.
Sipas tij, 12-14 deputetë është humbje për AAK-në.
“Humbës është edhe PSD-ja që në mënyrë të pashpjegueshme iu bashkëngjit AAK-së. U bënë bashkë, dihej sekret publik që Haradinaj e Ahmeti kanë relacione të afërta. 12-14 deputetë, janë humbje për AAK-në, sepse po të mbaheshin zgjedhjet një javë pas dorëheqjes së Haradinajt, ai do të merrte 20 për qind e do të dilte mirë”, ka deklaruar më tej Qorrolli.
Ai ka shtuar se rënia e votave për koalicionin AAK-PSD është goditje e madhe ndaj kryetarit të kryeqytetit, Shpend Ahmeti, kryetar i PSD-së. Nëse Ahmeti s’arrin të fitojë votat për deputet, sipas Qorrollit, ai duhet të reflektojë.
Për rrezikun që koalicioni Nisma-AKR-PD të mos e kalojë pragun, Qorrolli ka thënë se partitë që tradicionalisht ka udhëhequr partia e Fatmir Limajt “ishin të njohura për qeverisjet kapëse, klienteliste, kanë futur njerëz në punë pasivisht e kanë kontrolluar resurset panatyrshëm”.
Qorrolli ka kritikuar kryetarin e AKR-së, Behgjet Pacolli për punën si ministër i Jashtëm.
“Është tallur kryesisht me dikasteret ndër më të rëndësishmet duke futur militantë partiakë për t’u kryer favore njerëzve që i ka konsideruar të fortë politikisht. Diplomacia u shndërrua në kartë punësimi”, ka deklaruar më tej ai.
