Rey Manaj largohet nga Barcelona, për të nisur një aventurë të re në futbollin anglez. Sulmuesi shqiptar transferohet te Watford, skuadër që gjatë sezonit të kaluar u pozicionua në vendin e 19-të në Premier League dhe në edicionin e ri do të luajë në Championship, nivelin e dytë të futbollit në ishull.
Pas huazimit te Spezia, ku ishte një prej lojtarëve vendimtarë në mbijetesën në Serie A, Manaj u kthye në Camp Nou, por vetëm për tëpritur të reja rreth së ardhmes. Me Barcelonën që është dëshpërimisht në kërkim të financave, shitja ishte e paevitueshme.
Nga kjo situatë përfitoi Watford, që kërkon përforcime për të synuar rikthimin e menjëhershëm në elitën e futbollit anglez. Ekipi i qytetit pranë Londrës siguroi shërbimet e 25-vjeçarit, për një shifër që ende nuk është bërë e ditur.
Deri më tani është zbuluar vetëm se Manaj do të jetë pjesë e “Djemve të Artë” për tre vitet në vijim, ndërsa Barcelona ruan të drejtën e 20 për qind të të ardhurave, në rast se lojtari shitet në një skuadër tjetër. Për karakteristikat që ka, kuqeziu pritet të jetë lideri i sulmit te Watford.
Marrëveshja u realizua në një moment kur dukej se transferimi dështoi, por ajo ishte vetëm një manovër e klubit për të siguruar firmën larg zhurmës mediatike. I rritur te Akademia e Interit, Manaj numëron edhe 31 ndeshje me Kombëtaren shqiptare, ku ka shënuar 7 gola.
