Ndihmës sekretari amerikan i Shtetit, Filip Riker i bëri thirrje opozitës të tregojë konstruktivitet për ligjin për prokurorinë publike, me të cilin duhet të zgjidhet statusi i ardhshëm për Prokurorinë Speciale Publike dhe porositi se koha për lojëra politike ka kaluar.
“I gëzohem mundësisë për t’u takuar me opozitën. Si edhe në çdo demokraci të vërtetë, roli i opozitës është kyç, por ajo duhet të jetë edhe konstruktive. Koha për lojëra politike dhe për theksimin e gjesteve të mëdha, si dhe për lojë me perspektivat e qytetarëve, tashmë ka kaluar. Porosia ime është e qartë – është koha të lëvizin gjërat për të mirën e vendit”, tha Riker në konferencën e përbashkët për shtyp me kryeministrin Zoran Zaev.
Maqedonia e Veriut, siç theksoi, po lëvizë përpara në përmbushjen e qëllimeve shumëvjeçare lidhur me integrimet euroatlantike – të bëhet aleate e NATO-s dhe t’i fillojë negociatat për anëtarësim në BE.
Zgjidhja e çështjes lidhur me ligjin për PP-në, sipas Rikerit, është kyçe për procesin, por edhe për qytetarët.
“Kjo është diçka që qytetarët dëshirojnë ta shohin të zgjidhur. Koha e mbajtjes së kësaj çështje nga ana e opozitës tashmë duhet të përfundojë dhe shpresoj se ata do të kenë qasje konstruktive. SHBA-ja dëshiron të punojë me të gjitha partitë politike në Maqedoninë e Veriut, por për ta bërë atë siç tha presidenti Donald Tramp dhe sekretari i Shtetit, Majk Pompeo, duhet të shohim përpjekje të matura, ndërsa ligji për PSP-në duhet të lëvizë. Miratimi i tij tani, do të thotë se kjo tashmë nuk do të jetë çështje dhe BE-ja do të mund t’i hapë negociatat në vjeshtë. Për këtë ka mbështetje të fuqishme edhe nga aleatët në BE. Prandaj e nxisë opozitën të lëvizë, në mënyrë që të kemi të ardhme edhe më të ndritur”, theksoi Filip Riker.
