“Qëllimi jonë është t’i kujtojmë, por të mos lejojmë që asnjëherë të përsëriten skenat ndarjes dhe shkaktimit të konflikteve të cilat njerëzit i ndajnë në “tonët dhe tuajit”. Le të mbeten vetëm kujtime dhe të mos përsëriten asnjëherë”.
Këtë e theksoi sot kryeministri Zoran Zaev, në ditën e hapur me iniciativë të organizatave qytetare me temë: “Konsultimet për përpunimin e strategjisë kombëtare për zhvillimin e konceptit për një shoqëri dhe interkulturalizmi në Maqedoni”, që u mbajt në hapësirat e qeverisë, përcjell Telegrafi Maqedoni.
Zaev tha se toleranca është kushti më i rëndësishëm për marrëdhëniet demokratike mes grupeve me dallime, si dhe siç tha është pikë e fillimit për vendosjen fund të mosdurimit dhe urrejtjes.
Ai shtoi se në vend të urrejtjes duhet të ketë komunikim, në mënyrë që të tejkalohen keqkuptimet dhe të ketë mirëkuptim.
“Një nga misionet e strategjisë është ta çmojmë vizionin e vendit tonë si shtet i maqedonasve, shqiptarëve, turqve, serbëve, romëve, vllehve, boshnjakëve dhe gjitha bashkësive tjera etnike”, tha Zaev.
Përveç Zoran Zaevit, në këtë ngjarje fjalim mbajti edhe ministrja e Drejtësisë Renata Deskoska.
