Blerim Sejdiu nënkryetari i Lëvizjes BESA, në një intervistë për TV Alsat, ka deklaruar se fotot që vijnë nga SHBA, janë fotot më të bukura që ne si shqiptarë mund të krenohemi, pasi foto të tilla disa zyrtarë nuk mund t’i bëjë edhe po të dëshironte.
“Ne kemi pasur liderë që janë thirrur në emër të shqiptarisë dhe në emër të ndryshimit dhe të BE-së, por nuk kanë pasur të drejtë të shkojnë në SHBA, apo sot nuk mund të shkojnë pasi kanë ikur në eksod për të mos u kthyer kurrë. Pra, është vërtetuar ajo që kemi thënë ne se këto nuk janë ashtu siç paraqiten dhe fytyra e vërtet po u del dita ditës”, tha Sejdiu.
Ai është shprehur se vizitat e liderëve të VLEN-it në SHBA, tregojnë se relacionet tona me administratën e SHBA-së do të vazhdojnë ngushtë të jetë në bashkëpunim dhe në koordinim për të gjithë politikat tona sa i përket BE-së dhe sigurisë në rajon.
“E rëndësishme është që të jetë koordinimi me administratën e SHBA-së për punët tona të cilat na presin, siç është lufta ndaj korrupsionit, rrugëtimin tonë drejtë BE-së dhe kështu me radhë. Për këtë fotografitë që na vijnë nga SHBA, tregojnë se na presin ditë më të mira dhe se kjo qeveri është qeveri stabile”, shtoi Sejdiu.
