Policia e Kosovës gjatë një aksioni sot ka ndaluar një automjetnë Sodovinë të Vitisë, të drejtuar nga personi me inicialet B.K. nga Ferizaj, i cili po transportonte 700 litra vajra motorike mallra kontrabandë nga Maqedonia Veriore.
Në njoftim thuhet se fillimisht sot rreth orës 15:00 është pranuar informatë se nga fshati Tanushe e Maqedonisë Veriore është duke lëvizur një furgon i bardhë, pa targa, i dyshuar me mallrakontrabandë dhe dyshohej se mallrat do t’i sjellë në drejtim të Vitisë.
Njësitet e Task Forcës operative të (DRPK) Lindje pas pranimit të kësaj informate kanë ndërmarr masa të nevojshme operativo-taktike duke bërë kontrolle në rrugët e brezit kufitar dhe rrugët dytësorë të fshatrave të Vitisë.
Njësitet e angazhuara policore, ndërkohë kanë pranuar informata tjera relevante se kombi i dyshuar i cili kishte sjell mallrat nga Maqedonia veriore i kishte shkarkuar ato në Drobesh –Viti, përderisa mallrat e shkarkuara nga kombi janë ngarkuar në mjetin tjetër transportues WV Caddy, ngjyrë e kuqe me targa vendore, dhe i njëjti është në drejtim të rrugës Viti-Gërlicë.
Gjatë një veprimi taktik policia ka arritur në Sodovinë, komuna e Vitisë, ta ndalojë automjetin në fjalë ku janë gjetur 70 pako me nga 10 litra vaj motorik.
Rasti është duke u trajtuar nga autoritetet për procedura të mëtejme ligjore.
