Presidenti francez Emmanuel Macron i ka bërë thirrje Izraelit të përcaktojë më mirë qëllimet e tij për luftën, duke shtuar se shkatërrimi total i Hamasit do të kërkonte 10 vjet luftime.
Gjatë fjalës së mbajtur në një konferencë për shtyp në bisedimet për klimën COP28 në Dubai, Macron tha se do të udhëtonte në Katar për të “punuar së bashku për një armëpushim të ri sa më shpejt të jetë e mundur”.
Izraeli tërhoqi të shtunën ekipin e tij të negociatorëve nga Katari pas bllokimit të bisedimeve, sipas një deklarate nga zyra e kryeministrit izraelit Benjamin Netanyahu. Macron tha se duhet të ketë një armëpushim të përhershëm.
“Unë mendoj se jemi në një moment kur autoritetet izraelite do të duhet të përcaktojnë më saktë qëllimin e tyre dhe rezultatin përfundimtar që po përpiqen të arrijnë. Çfarë do të thotë shkatërrimi total i Hamasit? A mendon dikush se është e mundur?”, tha Macron.
“Nëse është kështu, lufta do të zgjasë 10 vjet dhe nuk mendoj se dikush është në gjendje ta përcaktojë këtë qëllim. Kështu që do të duhet të përcaktohet më mirë,” shtoi ai.
Macron ka përsëritur të drejtën e Izraelit për t’u mbrojtur, por ai tha se “e drejta për mbrojtje nuk ju jep, në asnjë mënyrë, të drejtën për të sulmuar civilët”. Forcat e Mbrojtjes së Izraelit kanë thënë se nuk synojnë civilët.
