Shoqata Kulturore “DUFLLA” aktivitetet e saja përveç sferës së kulturës i zgjeron edhe me akademi shkencore, arsimore, zbulime dhe hulumtime. Festat e nëntorit është projekti që për 3 vite me radhë organizon shoqata Duflla me akademi shkencore dhe koncerte festive.
Këtë vit me shënimin e 110 vjetorit të Kongresit të Manastirit dhe Ditës së Alfabetit të Gjuhës Shqipe shoqata kulturore “DUFLLA” organizoi tryezë shkencore me temë:
Zhvillimi i arsimit dhe edukimit në komunën e Sarajit dhe më gjërë.
Në këtë tryezë morën pjesë studiues nga vendi edhe atë: Dr. Bedri Gjureci, Dr. Isamet Bakiu, Dr. Besnik Rameti, Mr. Raim Limani, Mr. Liman Aliji, Mr. Burim Rexhepi, Mr. Muarem Ajdari, Prof. Ismail Ibishi, Prof. Naser Miftari, Prof. Vebi Rustemi, Prof. Abedin Krosi, Prof. Baki Bakiu, Afrim Tanallari dhe Refik Krosi.
Studiuesit kishin përgatitur tema nga më të ndryshmet duke veçuar: Hapja e shkollave shqipe në Derven të Shkupit dhe Tetovës, Arsimi dhe të mësuarit në shekullin XXI arritjet dhe pritjet, Rëndësia e edukimit në ndërtimin e demokracisë, Reformat në sistemin arsimor dhe ndikimi i tyre në zhvillimin e arsimit, Teknologjia IT dhe metodat e reja mësimore, Pasqyrimi i mediave për shqiptarët e Maqedonisë etj.
Të pranishëm ishin edhe shumë arsimtarë e profesor, nxënës dhe student, përfaqësues të institucioneve lokale dhe qendrore si dhe njerëz të sferave të ndryshme që shprehën interesim të madh për zbulimet, analizat dhe kritikat e studiuesve.
Mirënjohje u ndanë për të gjithë pjesëmarrësit mirëpo këtë vit shoqata Duflla e nderoi veteranin e arsimit me mirënjohje të veçantë prof. Baki Bakiun.
