Manchester Unitedi ka konfirmuar se trajneri aktual në detyrë dhe ish-sulmuesi legjendar i klubit, Ole Gunnar Solskjaer, është emëruar në pozitën e trajnerit të “Djajve të kuq” me kontratë trevjeçare.
Solskjaer i kishte shënuar 126 gola në 366 paraqitje për Manchester Unitedin gjatë viteve 1996 dhe 2007, si dhe ishte trajner i ekipit të rezervave deri në fund të vitit 2010, transmeton Gazeta Express.
Norvegjezi u emërua trajner në detyrë i “Djajve të Kuq” më 19 dhjetor të vitit të kaluar, rreth 24 orë pas shkarkimit të Jose Mourinhos, dhe i fitoi tetë ndeshjet e tij të para në këtë pozitë.
Nga gjithsej 19 ndeshjet e zhvilluara që nga atëherë, Solskjaer i fitoi 14 ndeshje, ndërsa i barazoi vetëm dy të tjera, duke marrë më shumë pikë sesa të gjithë klubet e tjera të Premierligës gjatë kësaj kohe.
“Prej ditës kur erdha, u ndieva në shtëpi në këtë klub të veçantë. Ishte nder të isha lojtar i Manchester Unitedit dhe ta filloja karrierën time këtu. Muajt e fundit kanë qenë një përvojë fantastike”, ka thënë Solskjaer.
“Dua t’i falënderoj të gjithë trajnerët, lojtarët e stafin për punën që e kemi bërë deri më tani. Kjo është puna për të cilën kam ëndërruar gjithnjë dhe jam shumë i emocionuar për mundësinë për ta drejtuar këtë klub dhe për sjellë suksesin që tifozët tanë të mrekullueshëm e meritojnë”.
Kur ish-sulmuesi legjendar i “Djajve të kuq” e mori pozitën e trajnerit, klubi i tij ishte i pesti me rekordin më të keq defansiv në Premierligë.
Por, që nga shkarkimi i Jose Mourinhos dhe emërimi i Solskjaerit si trajner i përkohshëm, Manchester Unitedi i ka shënuar 17 gola në 19 ndeshje dhe e ka mbajtur portën e paprekur në shtatë prej tyre.
Gjatë kësaj kohe, vetëm Liverpooli ka rekord më të mirë në mbrojtje se Manchester Unitedi.
