Orët e para si Ministër i Shëndetësisë, Arben Taravarin, e gjetën në vizitë në sallat kirurgjike jashtë funksionit në Qendrën Klinike. Kërkon vetëm disa ditë kohë për një vendim që do ta zgjidhte problemin me këto salla që kanë rreth një muaj që funksionojnë vetëm me kompresorë të jashtëm.
“Më intereson si më shpejtë ta zgjedhim problemin. Më duhen disa ditë kohë që të sjellim një vendim përfundimtar. A do të shkojmë në zgjedhje të shpejtë të problemit a do të shkojmë me blerje të re dhe menjëherë instalimin e komplet sistemit ose mund kjo të rregullohet. Deri të premten do t’u tregoj se çfarë vendimi do të marrim si Ministri e Shëndetësisë”, tha Taravari.
Punën e parë që e bëri si ministër është shkarkimi i disa ushtruesve të detyrës drejtorë ekonomikë të klinikave. Ky post, siç tha, nuk do të ekzistojë më. Do të shkarkohen edhe të tjerët, sapo të gjendet zgjidhje ligjore.
“Drejtorë ekonomik janë 14, kemi dhënë urdhër në ministri. Do të shkoj në Shtip ta vizitojmë spitalin, do të kthehem t’i nënshkruaj dhe do të shkarkohen një numër i caktuar i drejtorëve ekonomik, të cilëve do t’u mbarojë mandati deri kah mesi i korrikut, të gjithë do të shkarkohen. Ato që janë me mandate do të duhet të ndryshohet ligji që sa më shpejtë të shkojë në kuvend që të mos ketë më drejtorë ekonomik”, tha më tej Taravari.
Në Shtip ishte me kryeministrin Hristijan Mickoski. Pas vizitës së Spitalit të Shtipit, Taravari tha se do të kërkohet kompani e re e cila do të punojë dhe nëse jepet leje nga Ministria e Financave menjëherë do të nisin punimet.
Sa i përket çështjes së specializantëve privat, Taravari tha se do duhet punësohen në shtëpitë e shëndetit publik.
