Presidenti i Kosovës, Hashim Thaçi i ka dërguar ftesë zyrtare kryeministrit të Kosovës në detyrë, Albin Kurti, për takim konsultativ, në zyrën e presidentit, më 1 prill.
Në ftesën e presidentit Thaçi thuhet që pas mocionit të mosbesimit të qeverisë, ai do të ndërmerrë hapat e përcaktuar me Kushtetutë.
“Në këtë drejtim, ju ftoj që të merrni pjesë në takimin konsultativ për të diskutuar hapat e mëtejshëm”, thuhet në ftesën e Thaçit dërguar Kurtit.
Presidenti Thaçi, më herët ka paralajmëruar se gjatë kësaj jave do të nisë takimet me liderët e partive politike, për të shqyrtuar hapat e mëtejmë pas mocionit të mosbesimit për qeverinë.
Më 25 mars, me 82 vota për, 32 kundër dhe 1 abstenim, deputetët e Kuvendit të Kosovës kanë votuar mocionin e mosbesimit ndaj qeverisë së udhëhequr nga kryeministri, Albin Kurti.
Mocioni i mosbesimit ndaj Qeverisë Kurti u iniciua nga partnerja e koalicionit qeverisës, Lidhja Demokratike e Kosovës dhe u mbështet edhe nga partitë opozitare.
