Njëra nga mediat më prestigjioze britanike ‘The Economist’ në botimin e saj të fundit publikon analizë për marrëveshjen për zgjidhjen e kontestit të emrit mes Maqedonisë dhe Greqisë me titull “Njihuni me një shtet të ri: Maqedonia Veriore”, ku theksohet se pas thuajse 30 vitesh konflikt dy shtetet janë dakorduar që emri i ri i Maqedonisë të jetë ‘Maqedonia Veriore’.
“Aleksandrit të Madh ju nevojit shumë më pak kohë për të pushtuar botën në kohën antike se Maqedonisë dhe Greqisë për të zgjidhur kontestin e emrit”, duke bërë ironi për kohëzgjatjen e mosmarrëveshjes mes dy shteteve për emrin kushtetues të Maqedonisë.
Në këtë analizë thuhet se më 12 qershor është shpallur arritja e marrëveshjes mes dy shteteve fqinje, duke vendosur që emri i ri i IRJM-së të jetë “Maqedonia Veriore”, një formulë që siguron se asnjëri prej dy shteteve nuk ka monopol mbi trashëgiminë historike të rajonit.
Më tej përmenden lëvdatat që kanë pranuar kryeministrat e Maqedonisë dhe Greqisë, Zoran Zaev dhe Alexis Tsipras nga SHBA-të dhe mbarë bashkësia ndërkombëtare për “vizion, kurajo dhe këmbëngulje” në përpjekjet e tyre.
Analiza vazhdon duke theksuar vështirësitë që priten në të dyja anët për të arritur mbështetje të gjerë në mesin e popullit, duke përmendur rezistencën e shfaqur nga partia opozitare greke Nea Dimokratia në krye me Kyriakos Mitsotakis, i cili refuzon të përkrahë formulën e re që lejon fqinjët verior të Greqisë të mbrojnë ekzistencën e kombit dhe gjuhës maqedonase.
“Për protestuesit në Greqi, çdo përdorim i fjalës Maqedoni, konsiderohet tradhti. Ndërsa në Maqedoni, propozimi për emrin e ri duhet të vendoset për votim në referndum. Duhet të kryhen edhe ndryshime të Kushtetutës, veprim për të cilin nevojiten dy të tretat e votave në Kuvend, gjë që shumica e udhëhequr nga Zoran Zaev nuk e ka.”, shkruan “The Economist”.
Shkrimi i gazetës angleze përfundon me një thënie të Aleksandrit të Madh: “Sa të mëdha janë rreziqet me të cilat ballafaqohem për të fituar një emër të mirë”.
