Një ngjarje e rëndë ka ndodhur mëngjesin e sotëm në qytetin e Tiranës, ku si pasojë e një aksidenti ka humbur jetën tragjikisht një 23-vjeçare.
Siç njofton Policia, 23-vjeçarja po qëndronte në oborrin e shtëpisë, kur një makinë doli nga rruga dhe e përplasi atë duke i shkaktuar lëndime të rënda trupore.
“Shtetasi D. T., duke drejtuar automjetin, ka humbur kontrollin mbi drejtimin e tij duke dalë nga rruga dhe ka hyrë në oborrin e një banese”, thuhet në njoftimin e Policisë.
Sipas mediave të Shqipërisë, vajza e re ka ndërruar jetë në spital pasi nuk arriti t’i përballojë plagët e marra.
Njoftimi i Policisë:
Tiranë/Informacion paraprak
Më datë 31.08.2022, rreth orëve të para të mëngjesit, në rrugën “Shaban Bardhoshi”, shtetasi D. T., duke drejtuar automjetin, ka humbur kontrollin mbi drejtimin e tij duke dalë nga rruga dhe ka hyrë në oborrin e një banese.
Si pasojë është dëmtuar shtetasja M. S., 23 vjeçe, që ndodhej në oborrin e banesës së saj, e cila më pas, ka ndërruar jetë në spital.
Grupi hetimor po punon për sqarimin e rrethanave të aksidentit.