Pensionistët të harrojnë rritjen graduale të pensioneve të tyre. Ministrja e Punës dhe Politikës Sociale, Jovanka Trençevska, në raportin e fundit, i cili duhet të dalë deri në fund të kësaj jave, tha se nuk është paraparë rritje lineare e pensioneve. Sipas saj duhet mbajtur llogari për qëndrushmërinë e sistemit pensional, andaj dhe nuk mund të ketë tani për tani rritje, por gjithsesi pensionistëve të drejtën e protestimit nuk ua mohon.
“Pres që këtë javë të dorëzohet raporti i grupit punues, i cili do t’i dorëzohet Qeverisë në mënyrë që së bashku të vendosim se cilat masa shtesë do të miratohen në pakon e re të masave kundër krizës. Ndër këto masa nuk ka rritje lineare, sepse rritja lineare nuk është në favor të të gjithë pensionistëve. Me metodologjinë e re, vetëm për një vit e gjysmë pensioni më i ulët është rritur për gati 2,200 denarë, ndërsa sipas rritjes së pensioneve do të vazhdojë të aplikohet metodologjia e re dhe do të shkojmë me atë që është zgjidhja ligjore tani për momentin.”, – deklaroi ministrja e Punës dhe Politikës Sociale, Jovanka Trençevka.
Qeveria dhe Ministria e Punës dhe Politikës Sociale kane gatishmëri të negociojnë sa i përket përmirësimit të gjendjes financiare e pensionisteve në të ardhmen, mirëpo çdo rrije joreale tani do të vinte në pikëpyetje shlyerjen e rregullt të pensioneve në kohë, sqaron Trençevska.
“Çdo rritje joreale e pensionit dhe çdo shpenzim joreal i fondeve në Fondin e Sigurimeve Pensionale dhe Invalidore do ta bëjmë të pasigurt pagesën e pensioneve për të gjithë 336 mijë pensionistët. As si Qeveri dhe as si ministre e Punës dhe Politikës Sociale nuk do të lejoj që të dëmtohet stabiliteti i Fondit Pensional. Nga viti 2017 e tutje po punohet për rritjen e të hyrave në Fondin Pensional dhe këtë e tregojmë me uljen e deficitit, i cili në vitin 2017 ishte rreth 47 për qind, ndërsa tani është ulur në 33 për qind.” – theksoi ministrja e Punës dhe Politikës Sociale, Jovanka Trençevka.
Sipas Trençevskës, metodologjia ka dhënë rezultate të shkëlqyera sepse nga 1 janari i vitit 2022, kur pensioni minimal ishte 10,487 denarë, dje është paguar pensioni më i ulët në vlerë prej 13,200. Pra, pensioni është rritur për më shumë se 3,000 denarë për vetëm një vit e gjysmë. Trançevska këto komente i bëri gjatë vizitës së Kopshtit për fëmijë “13 nëntori” kushtuar “Javës së Fëmijëve”.
