Një ngjarje makabre ka tronditur SHBA-në, ku një nënë akuzohet për vrasjen e tre fëmijëve të saj.22-vjeçarja, Rachel Henry u arrestua në 20 janar të këtij viti, pasi ajo pranoi se vrau fëmijët e saj nën moshën 4-vjeç.
Vogëlushët që u mbytën nga nëna ishin dy vajza, 1-vjeç dhe 7-muajshe dhe një djalë 3-vjeçar.
Sipas hetimeve të deritanishme, e reja i vrau fëmijët njëri pas tjetrit, teksa ishte duke kënduar.
Ngjarja tronditëse ka ndodhur në Phoenix, Arizona.
Në dëshminë e saj para autoriteteve, ajo ka deklaruar se fillimisht mbyti vajzën e saj 1-vjeçare, duke i mbyllur gojën me dorë, deri sa vogëlushja dha shpirt.
Më pas, 22-vjeçarja tregoi se mbyti djalin e saj 3-vjeçar, i cili filloi të qante dhe ta shkelmonte nënën e saj pasi mbyti foshnjën 1-vjeçare.
Ajo nuk u mjaftua me kaq, dhe në fund mbyti edhe vajzën tjetër, vetëm 7-muajshe, sërish duke i mbyllur gojën me duar.
Më tronditës në këtë ngjarje makabre është fakti se ajo i mbyti fëmijët duke u kënduar ninulla, ndërsa burri i saj ndodhej në dhomën tjetër.
Ajo i vendosi kufomat e tre fëmijëve të vdekur në dyshemenë e dhomës së ndenjes, gjoja sikur ishin duke fjetur.
Rachel nuk i tregoi asgjë bashkëshortit të saj, por vazhdoi sikur asgjë nuk kishte ndodhur, transmeton JOQ. Bashkëshorti e kuptoi më vonë që fëmijët kishin vdekur dhe lajmëroi autoritetet.
Sipas raportimeve nga mediet e huaja, mamaja e re ishte përdoruese e lëndëve narkotike dhe kohët e fundit filluar të sillej çuditshëm.
Megjithatë, hetimet zbuluan se në momentin e krimit tronditës ajo nuk ishte nën efektet e drogës.
Seanca gjyqësore ndaj saj, ku do të jepet vendimi përfundimtar për të, do të zhvillohet më 28 janar.
