Presidenti amerikan Donald Trump tha sot se do të zhvillojë të hënën një bisedë telefonike me homologun rus Vladimir Putin, për përfundimin e luftës në Ukrainë përpara se të diskutojë për të njëjtën temë me presidentin ukrainas Volodymyr Zelensky dhe disa liderë të vendeve anëtare të NATO-s.
Trump tha se telefonata me Putinin do të kishte të bënte me ndalimin e asaj që ai e quajti “gjakderdhje” në Ukrainë.
“Tema e thirrjes do të jetë përfundimi i gjakderdhjes”, shkroi presidenti amerikan në platformën e tij Truth Social.
Trump shprehu shpresën se e hëna do të jetë një ditë produktive, se do të ketë një armëpushim dhe “kjo luftë shumë e dhunshme, një luftë që nuk duhet të kishte ndodhur kurrë, do të përfundojë”.
Komentet e Trump vijnë një ditë pasi bisedimet e para të drejtpërdrejta midis Moskës dhe Kievit në vite nuk arritën të siguronin një armëpushim.
Putin kishte refuzuar ofertën e Zelensky për t’u takuar kokë më kokë në Turqi, pasi presidenti rus kishte propozuar negociata në Stamboll – edhe pse jo në nivel presidencial – si një alternativë ndaj armëpushimit “të plotë dhe të pakushtëzuar” të kërkuar nga Ukraina dhe aleatët e saj perëndimorë.
Më herët të shtunën, diplomatë të lartë nga Rusia dhe Shtetet e Bashkuara të Amerikës mbajtën të fundit në një seri telefonatash, pak pasi sekretari i Shtetit Marco Rubio tha se Vatikani mund të jetë një vend për bisedimet e paqes.
Bisedimet e së premtes përfunduan pas më pak se dy orësh pa armëpushim, por të dyja palët ranë dakord për shkëmbimin e një mijë robërve të luftës secila.
Shefi i inteligjencës së Ukrainës, Kyrylo Budanov, tha në televizionin ukrainas të shtunën se shkëmbimi mund të ndodhë që në fillim të javës së ardhshme.
Që kur bisedimet e ndërmjetësuara nga Shtetet e Bashkuara të Amerikës filluan në mars, strategjia e Ukrainës ka qenë të bindë administratën Trump se Putin nuk është i besueshëm. Administrata Trump ka shprehur zhgënjimin me bisedimet e ngecura dhe kërcënoi se do të tërhiqet nëse nuk arrihen rezultatet.
Ndërkohë, nëntë civilë u vranë dhe shtatë të tjerë u plagosën kur një dron rus goditi një autobus që evakuonte njerëzit nga Bilopillia, një qytet rreth dhjetë kilometra nga kufiri i Rusisë, sipas guvernatorit lokal Oleh Hryhorov dhe policisë kombëtare të Ukrainës.
Media lokale ukrainase Suspilne tha se pasagjerët në autobus po evakuoheshin nga qyteti kur ndodhi sulmi. Autoritetet po punojnë për identifikimin e disa prej viktimave, shumica prej tyre gra të moshuara.
