Sot, Alternativa mbajti takime me strukturat dhe aktivin e partisë në
degët e Vrapçishtit dhe Tearcës, nën moton “Vazhdojmë me përgjegjësi dhe
dinjitet,” duke diskutuar për situatën aktuale politike, transparencën
dhe llogaridhënien në qeverisje si pjesë e koalicionit VLEN. Fjalë
përshëndetëse mbajtën kryetarët e degëve të Vrapçishtit dhe Tearcës, z.
Bejtulla Demiri dhe z. Arian Hakiki, Nënkryetari Afan Elezi,
zëvendësministrja e Sportit Safije Sadiku Shaini, zëvendësministri i
Arsimit dhe Shkencës pr. Lulzim Aliu, deputetja Imerlije Saliu,
Sekretari Organizativ Bashkim Murtezi dhe Sekretari i Përgjithshëm Amir
Elezi.
Në përmbyllje, kryetari i Alternatives, z. Zeqirija Ibrahimi, u shpreh:
“Jam i lumtur që drejtoj një ekip që nuk ka frikë të takohet me
qytetarët. Kemi njerëz që kanë ruajtur dinjitetin e tyre ashtu siç ua
kërkuam votën, dhe sot jemi këtu për t’u dhënë llogari.”
Z. Ibrahimi më tej nënvizoi arritjet konkrete të qeverisjes VLEN, si
Abetarja Kombëtare, investimi prej 35 milionë eurosh për kampusin e
Universitetit “Nënë Tereza,” ndërtimi i shkollës në Çashkë, përparimet
në Korridorin 8 dhe rritja e pensioneve. Ai theksoi se përkushtimi i
Alternatives është për përmirësimin e jetës dhe mirëqenies ekonomike të
qytetarëve, duke mbështetur gjithashtu familjen shqiptare dhe vlerat
tradicionale. “Ne besojmë se kur cenohet koncepti i familjes, cenohet
edhe kombi,” theksoi ai.
Z. Ibrahimi gjithashtu tha: “Është krijuar përshtypja se Alternativa
është parti e vogël. Nuk është se nuk dimë si ta bëjmë të madhe, por ne
jemi të interesuar të kemi në parti njerëz familjarë dhe të ndershëm.”
U theksua se për shqiptarët në Maqedoninë e Veriut, e vetmja rrugë është
integrimi në BE dhe koalicioni VLEN është i përkushtuar për të
përshpejtuar këtë proces.
Takimet do të vazhdojnë në çdo vendbanim, duke sjellë transparencën dhe
llogaridhënien që shqiptarët kanë pritur prej vitesh.
