VMRO-DPMNE-ja vazhdon të insistojë se deklarata e Ministres së Kulturës ishte skandaloze, prandaj kërkojnë dorëheqjen e saj, shkruan Alsat.
Zëdhënësi i kësaj partie, Dimçe Arsovski, thekson se kjo është një censurë ndaj krijimtarisë dhe e njëjta bëhet në harmonizim me Protokollin që e ka nënshkruar Qeveria e Kovaçevskit.
“Bisera Stojçevska për të tretën ditë me radhë as nuk u kërkon falje qytetarëve dhe as nuk ka për qëllim që të ofrojë dorëheqje. Duke u vendosur në rolin e “vëllait të madh” sikur në librin e Orvellit të vitit 1984, Stojçevska dëshiron të diktojë dhe të censurojë artistët se çfarë guxojnë të shkruajnë në veprat e tyre dhe çfarë jo”, tha Dimçe Arsovski, zëdhënës i VMRO-DPMNE-së.
Nga LSDM kanë theksuar se opozita po bën një interpretim arbitrar të deklaratës së ministres dhe se politikat e zbatuara në kulturë po inkurajojnë lirinë e shprehjes artistike.
Reagimet vijojnë pas deklaratës së ministres së Kulturës të dhënë pak ditë më parë, e cila duke u përgjigjur ndaj pyetjes, nëse mund të censurohen veprat të cilat nuk do të jenë në vijë me rregullat për shmangien e gjuhës së urrejtjes, ka theksuar se autorët në të ardhmen duhet të botojnë përmbajtje më argëtuese për publikun dhe jo t’i kthejë ata prapa në kohëra të zymta.
Lidhur me këtë deklaratë kanë reaguar edhe disa artistë. Por Ministrja e Kulturës në mënyrë shtesë sqaroi se asnjë projekt nuk do të censurohet për aq kohë sa do të jetë në krye të dikasterit të kulturës.
