Kryeministri, njëherë edhe lideri i LSDM-së, Zoran Zaev në intervistën e sotme për emisionin 360 gradë në Alsat ka folur edhe për deklaratën e djeshme të rivalit të tij kryesor, kreut të VMRO-DPMEN-së opozitare Hristijan Mickoski, i cili tha se gjatë vizitës në Gostivar, shqiptarët janë ngritur nga kafeneja, janë afruar dhe e kanë përqafuar dhe kanë deklaruar se do të votojnë për VMRO DPMNE-në. Zaev tha se me siguri që Mickoski ka përqafuar kreun e kësaj komune, Arben Taravari ose dikush nga ekipi i tij.
“E para, për ta dëshmuar këtë, duhet ta shohin ambientin përreth meje. Qytetarët nga të gjitha komunitetet etnike, shqiptarë, maqedonas, serbë, romë, turq, vllahë dhe boshnjakë, të gjithë tregojnë dashuri. Nuk e di nëse qasja ime është e tillë, a është narrativi im i tillë apo pamja është e tillë, nuk e di përse. Mickoski nuk e ka njohur z. Taravarin. Ndoshta e ka përqafuar ekipi rreth Taravarit. Që ta përqafojnë shqiptarët…dhashtë Zoti ta përjetojë këtë, duhet të dëshmohet, ta vendos narrativin e tij ashtu dhe të çlirohet nga filozofia e shefit të tij, “Maqedoni të pastër”, “Maqedonia e maqedonasve” e kështu me radhë. Çdoherë kemi qenë shtet multietnik dhe ashtu do të mbetemi. Nëse këtë nuk e ndryshon, mund ta shfrytëzojnë partnerët e tij politik, ata janë partner koalicioni në Gostivar dhe me siguri nuk e kanë njohur ose ka qenë Taravari ose shefi i tij i kabinetit dhe ekipi i tij”-pohoi Zaev.
