Janë gjetur të ashtuquajturat “dhomat e torturës” dhe pajisjet e përdorura nga forcat ruse në pjesët e rifituara të rajonit verilindor të Kharkiv, pohoi Presidenti i Ukrainës Volodymr Zelensky në fjalimin e tij të natës të shtunën.
“Më shumë se dhjetë dhoma torture janë gjetur tashmë në zonat e çliruara të rajonit të Kharkiv në qytete dhe qyteza të ndryshme. Ndërsa pushtuesit ikën, ata hodhën edhe mjetet e torturës. Edhe në stacionin e rregullt hekurudhor Kozacha Lopan, ata gjetën një dhomë për torturë, gjetën mjete për torturë elektrike”, tha Zelensky.
Më herët të shtunën, Zyra e Prokurorit Rajonal të Kharkivit bëri pretendime të ngjashme.
“Ushtria ruse torturoi njerëzit në bodrumin e të ashtuquajturës “milici popullore” në qytetin e Kozacha Lopan kur ishte nën rrethim. Përfaqësuesit e Federatës Ruse krijuan një agjenci pseudozbatuese, në bodrumin e së cilës ishte ngritur një dhomë torture, ku civilët u nënshtroheshin torturave çnjerëzore. Gjatë kontrollit u sekuestruan dokumente që konfirmojnë funksionimin e departamentit të pseudopolicisë dhe pajisjen me të cilën pushtuesit torturuan civilët me goditje elektrike”, tha në një postim në rrjetet sociale Zyra e Prokurorit Rajonal të Kharkiv.
Zyra e Prokurorit Rajonal të Kharkiv-it siguroi gjithashtu fotografi të dhomave të torturës dhe një pajisje me të cilën pushtuesit torturonin civilët.
