Misioni i BE-së për sundimin e ligjit, EULEX, tha se është i përgatitur për çfarëdo skenari të mundshëm për zgjedhjet e pjesshme në katër komunat në veri të Kosovës.
Në një përgjigje për RTV21, EULEX tha se është i gatshëm ta mbështes Policinë e Kosovës për ruajtjen e stabilitetit dhe sigurisë “EULEX-i po vlerëson zgjedhjet e pjesshme për katër kryetarët e komunave dhe dy kuvendet komunale në veri të Kosovës nga perspektiva e sigurisë. Në këtë drejtim, ne jemi të përgatitur për skenarë të ndryshëm të mundshëm në koordinim të ngushtë me Policinë e Kosovës dhe KFOR-in dhe jemi të gatshëm të mbështesim, si reagues i dytë i sigurisë, Policinë e Kosovës në masën maksimale të mundshme në ruajtjen e stabilitetit të Kosovës dhe sigurisë së të gjitha komunitetet e saj”, tha EULEX, për RTV21.
Misioni i BE-së për sundimin e ligjit tha se “njësia e Formuar e Policisë së Misionit, e përbërë nga 102 policë polakë me bazë në Qendrën e EULEX-it në Mitrovicë, dhe njësia policore e formuar rezervë, e cila përbëhet nga 24 xhandarë italianë dhe dhjetë lituanë, janë në fuqi të plotë. Duke filluar nga e premtja, 21 prill deri të dielën 23 prill, numri i patrullave të lëvizshme të zbulimit të EULEX-it është rritur: gjatë këtyre ditëve, gjithsej dhjetë patrulla të lëvizshme të zbulimit të FPU dhe RFPU, që punojnë në ndërrime 24/7 dhe të sinkronizuara me Policinë e Kosovës dhe KFOR-in janë vendosur në Mitrovicën Veriore, Zveçan/Zveçan, Leposaviq/Leposaviq dhe Zubin Potok, duke u fokusuar kryesisht në zonat përreth vendvotimeve. Përveç kësaj, Njësia e Formuar Policore e EULEX-it dhe Njësia Policore e Formuar Rezervë vazhdojnë të patrullojnë në këmbë në Mitrovicën Veriore, Zveçan/Zveçan, Leposaviq/Leposaviq dhe Zubin Potok”, thuhet në përgjigjen e EULEX për RTV21./21Media
