Ministria e Punëve të Brendshme ka njoftuar se ekipet e zjarrfikësve nga disa komuna janë duke bërë përpjekje për t’i shuar zjarret në Parkun Nacional në Prevallë, në jug të Kosovës.
Ministria tha se zjarret nuk përbëjnë rrezik për jetën e banorëve dhe as për pasuritë e tyre në Prevallë, një fshat në komunën e Prizrenit në Malet e Sharrit.
“Agjencia për Menaxhimin Emergjent njofton të gjithë qytetarët se në situatën e krijuar nga zjarri në sipërfaqe të hapur në parkun nacional në Prevallë, aktualisht janë në operacione për fikjen e zjarrit nga toka, përveç Njësisë së Zjarrëfikjes dhe Shpëtimit nga Prizreni, edhe Njësitë e Zjarrëfikjes dhe Shpëtimit nga Gjakova, Prishtina dhe Ferizaj”, thuhet në njoftim.
Tutje bëhet e ditur se Policia e Kosovës, pjesëtaret nga Parku Nacional Prevallë dhe Shërbimi Emergjent Mjekësorë nga Prizreni janë duke i mbështetur përpjekjen e shuarjes së zjarrit./21Media
