Tanimë është zyrtare, Çabi Alonso është trajneri më i ri i Real Madridit pas largimit të Karlo Ançelotit. Ish-mesfushori spanjoll si futbollist ka lënë gjurmë në “Santiago Bernabeu”, derisa tani është rikthyer në rolin e trajnerit të ekipit të parë pas suksesit te Bajer Leverkuzen.
Ka qenë faqja zyrtare e klubit madrilen që ka njoftuar se Alonso tanimë ka marrë drejtimin e klubit dhe të hënën me fillim nga ora 12:30 do të ketë konferencën për shtyp dhe prezantimin e tij.
Njoftimi i plotë nga Real Madridi:
Klubi i Real Madridit njofton se Çabi Alonso do të jetë trajneri i Real Madridit për tre sezonet e ardhshme, nga 1 qershori 2025 deri më 30 qershor 2028.
Çabi Alonso është një nga legjendat më të mëdha të Real Madridit dhe të futbollit botëror. Ai e mbrojti fanellën tonë në 236 ndeshje zyrtare, midis viteve 2009 dhe 2014. Gjatë kësaj kohe, ai fitoi gjashtë tituj: Kupën e dhjetë Evropiane në Lisbonë, një Superkupë Evropiane, një titull La Liga, dy tituj të Kupës së Mbretit dhe një Superkupë Spanjolle.
Çabi Alonso është gjithashtu një legjendë e ekipit kombëtar spanjoll, me të cilin fitoi 1 Kupë Bote (2010) dhe 2 Kampionate Evropiane (2008 dhe 2012), në 113 ndeshje ndërkombëtare.
Çabi Alonso e filloi karrierën e tij si trajner në akademinë e të rinjve të Real Madridit, duke drejtuar ekipin U14 A gjatë sezonit 2018-2019, ku fitoi Ligën dhe Turneun e Kampionëve.
Tani ai kthehet te Real Madrid si një nga trajnerët më të mirë në botë, pasi bëri histori te Bajer Leverkuzeni, ku fitoi Bundesligën, Kupën dhe Superkupën e Gjermanisë në tre sezone.
Nesër, të hënën, më 26 maj, në orën 12:30, Çabi Alonso do të prezantohet si trajneri i ri i Real Madridit në një aktivitet që do të mbahet në Real Madrid.
Më parë, presidenti i Real Madridit, Florentino Pérez, do të mirëpresë Çabi Alonson në ceremoninë zyrtare të nënshkrimit që lidh trajnerin tonë të ri me klubin për tre sezonet e ardhshme. Pas prezantimit, Çabi Alonso do t’u drejtohet mediave në sallën e shtypit të Real Madridit.
