Rreth një milion refugjatë palestinezë në Gaza po përballen me mungesë ushqimore në Gaza për shkak të bllokimit izraelit në vazhdim dhe shkurtimit të fondeve globale për agjencinë e OKB-së për refugjatët palestinezë.
Me rastin e 20 qershorit, Ditës Ndërkombëtare të Refugjatëve, kreu i Komitetit popullor për t’i dhënë fund bllokimit në Gaza, Jamal al-Khoudary, tha se “rënia e vërtetë” në mbështetje nga donatorët ka pasur “pasoja serioze ndaj refugjatëve palestinezë në Gaza, Bregun Perëndimor, Kuds dhe në shtetet e tjera arabe”.
Al-Khoudary tha se vendimi i SHBA-ve dy vjet më parë për t’i ndaluar fondet për agjencinë UNRWA, që vlerësohet se është rreth 360 milionë dollarë në vit, ka ndikuar rëndë në operacionet e agjencisë.
Ai tha se bllokada e Izraelit në Gaza që nga viti 2006 ka rezultuar në shkallë të lartë të varfërisë dhe papunësisë në zonën e rrethuar.
Dita Botërore e Refugjatëve shënohet globalisht më 20 qershor dhe përqendrohet në rritjen e vetëdijes për vuajtjet e miliona refugjatëve në të gjithë botën.
