Ministria franceze e Financave bëri sot të ditur se qeveritë e Bashkimit Europian, të cilat kishin afat deri në fund të korrikut për të përzgjedhur një kandidat në krye të FMN-së, ende nuk kanë rënë dakord për një emër për të pasuar Christine Lagarde.
‘’Në këtë fazë, megjithëse disa kandidatë kanë siguruar më shumë mbështetje sesa të tjerët, nuk ka ende konsensus të plotë për një emër konkret’’, thuhet në komunikatën e Ministrisë.
Pesë kandidatë janë në garë, dy nga shtetet e Jugut, ministrja spanjolle e Financave, Nadia Calvino dhe homologu i saj portugez, Mario Centeno, gjithashtu president i Eurogrupit, dy të tjerë për pjesën e Veriut, holandezi Jeroen Dijsselbloem dhe guvernatori i bankës së Finlandës, Olli Rehn si dhe një kandidate e shteteve të Lindjes, bullgarja Kristalina Georgieva, aktualisht numri 2 i Bankës Botërore.
