Në Maqedoninë e Veriut është konfirmuar rasti i parë me koronavirusin e ri.
Ministri i Shëndetësisë, Venko Filipçe, njoftoi se bëhet fjalë për një shtetase, 50 vjeçe, e kthyer para disa ditëve nga një udhëtim në Itali.
Ajo së bashku me dy persona të tjerë, ishin paraqitur në Institutin e Sëmundjeve Infektive në Shkup, ku pas analizave të detajuara është konstatuar prania e virusit.
Dy personat e tjerë kanë rezultuar negativ.
“Nuk ka vend për panik. Institucionet kanë ndërmarrë të gjitha masat dhe gjendja është nën kontroll. Të gjithë personat që kanë udhëtuar së bashku me të infektuaren do kontrollohen dhe do të vendosen në izolim 14 ditor “, ka deklarur ministri Filipçe.
Ministria e Shëndetësisë më herët ka njoftuar se po shqyrton mundësinë e izolimit të të giithë pasagjerëve që udhëtojnë nga Italia.
