Kryeministri Dimitar Kovaçevski pret që takimi i liderëve të jetë konstruktiv.
I pari i Qeverisë thotë se të hënën pret nga liderët e partive politike të unifikojnë qëndrimet për datat e zgjedhjeve presidenciale dhe parlamentare si dhe përfshirjen e rekomandimeve të OSBE-ODIHR-së në Kodin Zgjedhor, shkruan Alsat.
Kovaçevski tha se para datave të zgjedhjeve që rezultojnë të jenë në muajin maj, duhet mbajtur përgjegjësi edhe për festat fetare në prill dhe fillim të muajit maj.
“Pres takim konstruktiv të liderëve ku do të marrin pjesë të gjitha partitë politike të përfaqësuara në Kuvend. Kjo është mënyra e vetme mbi të cilën funksionon një shoqëri demokratike. Pres qasje të tillë sepse këto do të jenë zgjedhjet e para të rregullta parlamentare pas vitit 2006. Deri tani të gjithë proceset zgjedhore parlamentare ishin të parakohshme të iniciuara në aeroporte, në Përzhino si dhe kishte nga ata që bënin blof me zgjedhje për përfitime politike”, u shpreh Dimitar Kovaçevski, Kryeministër.
Kovaçevski shtoi se për momentin palët kanë qëndrime të ndara mbi abrogimin e Qeverisë teknike, por u shpreh optimist se ndryshimet ligjore mund të bëhen tani, por abrogimi i formatit teknik të Qeverisë të hyn në fuqi pas zgjedhjeve parlamentare.
“Nuk ka gatishmëri për konsensus për abrogimin e saj në afat kaq të shkurtër kohor tani pas zgjedhjeve, por sigurisht që ka gatishmëri që ajo të abrogohet por të jetë në fuqi pas zgjedhjeve që pasojnë. Qeveria teknike nuk duhet të shikohet si pengesë për organizimin e zgjedhjeve. Opozitës i është ofruar edhe më shumë se kaq, pra gjysma e resorëve me kushtin e vetëm që të mbështesë procesin integrues. Ajo ofertë akoma është e hapur”, tha Dimitar Kovaçevski, Kryeministër.
Të hënën liderët e partive politike të përfaqësuara në Kuvend mblidhen për të diskutuar parimisht mbi zgjedhjet parlamentare dhe ndryshimet në Kodin Zgjedhor, ndërsa përcaktimi i datave të zgjedhjeve do të mbetet temë diskutimi mes grupeve të punës që do t’i vazhdojnë negociatat në Kuvend.
Parimisht partitë janë pajtuar që zgjedhjet parlamentare të mbahen në raundin e dytë të zgjedhjeve presidenciale. Në fund të muajit janar duhet formohet Qeveria teknike, ndërsa në fund të muajit shkurt të shpallen zgjedhjet parlamentare dhe të shpërndahet Kuvendi./ Alsat.mk
