Pas raportimit të djeshëm nga ana e Qendrës për Menaxhim me Kriza se në më shumë se 13 lokalitete të vendit kemi zjarr aktiv, është më shumë se skandaloze se qysh arriti në mbrëmje të mos lokalizohet zjarri në Koçani dhe kështu të rrezikohet, madje, edhe jeta e qytetarëve.
Që skandali të jetë edhe më i madh flet fakti se përderisa dje disa vende dhe qytete ishin në rrezik të madh nga djegia e tërësishme, Drejtori i Qendrës për Menaxhim me Kriza, Stojanço Angellov, e festonte Ilindenin me këngëtarë të estradës, ndërsa për Koçanin që digjej as që i bëhej vonë. Kësaj në shqipen tonë i thonë “Fshati digjej, plaka krihej”. Ndërsa, nga ana tjetër, edhe më skandaloze është deklarata e Bekim Maksutit, Drejtor i Drejtorisë për Mbrojtje dhe Shpëtim, i cili si në stilin “Mesharin e Gjon Buzukut e ka shkruar Marin Barleti”, tha se avionët e shpëtimit janë jashtë përdorimit për arsye se servisimi kushton shumë.
Në kohën kur Qeveria e Maqedonisë së Veriut merr hua 900 mil. euro, ndërsa rreth 2 mil. euro i ndan për huazim te makinave të reja për funksionarë shtetërorë, të dalësh me deklarime se helikopterët janë pa derivate dhe se avionët janë jashtë përdorimit, kjo flet jo vetëm për paaftësinë që ka kjo Qeveri për menaxhim me kriza, por edhe për pakujdesinë, të mos themi papërgjegjësinë e saj totale.
Nisur nga kjo, AlternAtivA kërkon përgjegjësi nga Angelovi dhe Maksuti – që sot le të japin dorëheqje morale pas këtij dështimi skandaloz.
Gjithashtu, apelojmë deri te Qeveria që urgjentisht të gjenden mjete për servisim të avionëve, që në të ardhmen mos të na përsëriten ngjarje të këtilla tragjike.
