Aleanca për Shqiptarët ka akuzuar autoritetet vendore se kanë dështuar në përballjen me virusin Korona. Siç thonë nga kjo parti, jorastësisht RMV radhitet ndër vendet më të rrezikuara në botë. Bekim Tateshi nga ASH thotë se shkaqet për gjendjen e rëndë në shëndetësi kanë qenë: keq-menaxhimi i pandemisë, infrastruktura e vjetruar dhe politikat kadrovike.
“Gjatë vitit 2021 shteti kaloi valën e tretë dhe të katër, ndërsa politik-bërësit shëndetësorë nuk e pritën këtë virus të përgatitur. Si pikë e dytë është infrastruktura e vjetruar, nuk u mbajt premtimi për ndërtimin e Qendrës së re Klinike në Shkup, spitalit në Shtip, Strugë, përfundimi i ndërtimit të ndërtesës së re në Kërçovë. Sa i përket politikave kadrovike, vlen të theksohet se nuk janë respektuar politikat e meritokracisë.”,- deklaroi Bekim Tateshi nga ASh.
ASh për vitin 2022 tha se duhet të bëhet një fushatë më e madhe për vaksinim dhe në këtë fushatë të kyçen ekspertë, sektori joqeveritar, punonjësit fetarë etj.
