Gjatë fjalimit të tij në Asamblenë e Përgjithshme të Kombeve të Bashkuara, presidenti i Shteteve të Bashkuara të Amerikës, Joe Biden, tha se mbështetja e Ukrainës në mbrojtjen e saj kundër pushtimit të Rusisë është “jo vetëm investim në të ardhmen e Ukrainës, por në të ardhmen e çdo vendi” që vlerëson rregullat bazë të OKB-së për sovranitetin dhe integritetin territorial “që zbatohen në mënyrë të barabartë për të gjitha kombet” të mëdha dhe të vogla.
“Ne mbështesim fuqimisht Ukrainën në përpjekjet e saj për të sjellë zgjidhje diplomatike që sjell paqe të qëndrueshme. Vetëm Rusia, mban përgjegjësinë për këtë luftë. Vetëm Rusia ka fuqinë për t’i dhënë fund kësaj lufte menjëherë,” tha Biden, raporton CNN.
“Dhe është vetëm Rusia që qëndron në rrugën e paqes. Sepse çmimi i Rusisë për paqen është kapitullimi i Ukrainës, territori i Ukrainës dhe fëmijët e Ukrainës,” shtoi Biden.
Presidenti amerikan tha se Moska “beson se bota do të lodhet dhe do ta lejojë atë të brutalizojë Ukrainën pa pasoja”.
Biden sugjeroi se asnjë shtet anëtar i Kombeve të Bashkuara nuk do të ndihej i sigurt nëse Ukraina lejohet “të ndahet”.
“Ne duhet t’i bëjmë ballë këtij agresioni të zhveshur sot dhe të pengojmë agresorët e tjerë të mundshëm nesër. Kjo është arsyeja pse Shtetet e Bashkuara, së bashku me aleatët dhe partnerët tanë në mbarë botën, do të vazhdojnë të qëndrojnë me popullin e guximshëm të Ukrainës ndërsa mbrojnë sovranitetin dhe integritetin e tyre territorial dhe lirinë e tyre”, shtoi ai.
