Nënkryetari i Komunës së Gjilanit, Arbër Ismajli, ka thënë se aktualisht në këtë komuna janë 750 raste aktive me koronavirus.
Sipas tij, 100 janë të hospitalizuar në spitalin rajonal të Gjilanit, ndërsa pjesa tjetër po trajtohet në shtëpi.
Ai në emisionin Sot ka thënë se gjendja është ende e renduar për shkak të numrit të madh të rasteve aktive.
“Ka dy tri javë që nuk po zbret numri dhe kjo është shqetësuese. Është rrit numri i të infektuarve për shkak edhe të numrit të madh të testeve. Nëse më herët kanë qenë 500 teste, 250 kanë dalë të infektuar, kurse tashmë numri i testeve është rritur gati në 5000. Nuk është gjendja aq shumë e rëndë që të kthehet në pikën zero, por kështu ka ndodhur për shkak të masave”, ka thënë ai.
Ai ka thënë se nëse vazhdohet ky ritëm i menaxhimit të pandemisë, vështirësitë do të jenë më të mëdha.
Ai tutje ka shtuar se janë furnizuar me afër 1000 vaksina COVID. Sipas tij, janë 360 mjekë dhe teknik medicional që janë vaksinuar, duke shtuar se pjesa tjetër nuk e di pse nuk janë vaksinuar deri tash.
Ismajli ka shtuar se një pjesë e tjetër nuk ka shprehur gatishmëri dhe vullnet për t’u vaksinuar.
“Nëse mjekët nuk kanë pranuar të vaksinohen nuk e di se si do të pranojnë qytetarët”, ka thënë ai.
Ismajli ka thënë se në takimin me ministrin e Shëndetësisë kur është vendosur për masat e reja, ata i kanë përkrahur disa masa, por se kanë qenë kategorik kundër mbylljes,
Sipas tij, mbyllja do të shkaktojë probleme serioze.
Ai thotë se për shkak të kësaj gjendje rrezikon të shtohet numri i familjeve me asistencë sociale.
“Gjendja është e rëndë. Gastronomët kërkojnë vazhdimisht ndihmë nga ne. Nuk është korrekte me thënë që të gjithë gastronomët i kanë respektuar masat, por gjobat duhet të jenë individuale. Ne si komunë ka një vit që ju kemi dalë në ndihmë gastronomisë dhe të tjerëve që i kemi liruar nga pagesat e qirasë për shkak të solidarizimit për gjendjen me pandeminë. Unë bëj apel me ju rikthy mbështetja biznesit”, ka thënë ai.
Ismajli ka thënë se rreth 600 persona që kanë humbur vendet e punës në 8 muajt e parë të pandemisë, duke shtuar që numri i tyre tashmë është rritur.
Sipas tij, të prekur nga kjo gjendje është edhe transporti publik.
“Kushtet në spitalin e Gjilanit janë të mira. Ka pasur momente të caktuara që nuk kanë pasur vende, prandaj edhe qytetarët janë transportuar në Prishtinë. Aparaturë ka më pak, janë 80 shtretër që ofrojnë mundësi për oksigjenoterapi. Që një kohë të gjatë stafi shëndetësor ka punuar që të jetë afër qytetarëve”, ka thënë ai.
