Kërkohet burimi i informacionit për “Escherichia coli” në ujë – disa persona thirren në polici
Disa persona janë thirrur pasditen e së mërkurës për bisedë informative në stacion policor, pas përhapjes së informatave se uji i pijshëm në Shkup dyshohet se është i kontaminuar me bakterin Escherichia coli, raporton televizioni Sitel.
Informacionet që u përhapën mes qytetarëve dhe në rrjetet sociale shkaktuan shqetësim lidhur me sigurinë e ujit të pijshëm në kryeqytet.
Sipas informacioneve të publikuara, Ministria e Punëve të Brendshme ka ndërmarrë veprime për të përcaktuar se nga ka ardhur informacioni, kush e ka publikuar dhe në çfarë mënyre është përhapur në opinion.
Jozyrtarisht, në mesin e personave të thirrur për bisedë informative janë edhe dy gra. Prej tyre është kërkuar të sqarojnë se si kanë arritur deri te pretendimet për praninë e mundshme të bakterit Escherichia coli në ujë dhe përse këtë informacion e kanë shpërndarë te persona të tjerë.
Deri më tani nuk ka informacione zyrtare nëse gjatë procedurës është konstatuar ndonjë përgjegjësi eventuale e personave të thirrur në polici. / Aktuale.mk
