Kostovski: Nxënësit e Çairit që tashmë kanë vëlla ose motër në "Penko", do të mund të regjistrohen në këtë shkollë
Kryetari i Komunës së Butelit, Darko Kostovski, ka sqaruar detajet lidhur me marrëveshjen e arritur për pranimin e fëmijëve nga komuna e fqinjë e Çairit në Shkollën Fillore “Petar Zdravkovski – Penko”.
Kostovski deklaroi se është gjetur një zgjidhje kompromisi sipas së cilës nxënësit e klasave të para që vijnë nga Çairi, por që kanë tashmë një vëlla apo motër që ndjek mësimin në Sh.F. “Petar Zdravkovski – Penko”, do të lejohen të regjistrohen në këtë vatër arsimore.
Sipas tij, kjo masë do t’u lehtësojë prindërve organizimin e përditshëm familjar, ndërsa konfirmoi se kjo procedurë nuk do të nënkuptojë hapjen e paraleleve të reja, por do të shfrytëzohen kapacitetet ekzistuese brenda kuadrit ligjor dhe planifikimit hapësinor të shkollës.
Kjo çështje kishte nxitur reagime të shumta në opinion, ndërsa mbetet të shihet se si do të zbatohet ky proces gjatë regjistrimeve të fëmijëve për vitin e ri shkollor. / Aktuale.mk
