Për herë të parë në botë, 67-vjeçares së verbër i rikthet shikimin falë transplantit të retinës
Një 67-vjeçare italiane, e cila kishte humbur plotësisht shikimin pas një aksidenti të rëndë automobilistik, ka arritur të shohë sërish falë një ndërhyrjeje novatore të kryer në Torino.
Pacientja, e identifikuar si Elena, kishte pësuar dëmtime të rënda në të dy sytë. Në syrin e majtë, nervi optik ishte dëmtuar dhe nuk mund të transmetonte më sinjale drejt trurit. Për pasojë, edhe pse disa struktura të syrit kishin mbetur të shëndetshme, ai nuk mund të prodhonte shikim funksional.
Ndërkohë, syri i djathtë vuante prej më parë nga degjenerimi makular dhe ishte dëmtuar më tej nga aksidenti. Dëmtimet prekën retinën dhe kornenë, duke e lënë gruan pa shikim funksional për më shumë se pesë vjet.
Mjekët përdorën indet e njërit sy për të rikonstruktuar tjetrin
Në raste të tilla, transplanti i kornesë mund të jetë një alternativë, por dëmtimet e Elenës ishin shumë të mëdha për një procedurë të tillë.
Mjekët e Klinikës Universitare të Oftalmologjisë në spitalin Molinette në Torino vendosën të ndiqnin një qasje krejtësisht tjetër: të merrnin indet e shëndetshme, por jo funksionale, nga syri i majtë dhe t’i transferonin në syrin e djathtë, i cili ende kishte lidhje funksionale me trurin.
Operacioni u drejtua nga Dr. Michele Reibaldi dhe zgjati rreth gjashtë orë.
Kirurgët transferuan në syrin e djathtë pjesë të kornesë, sklerës dhe konjuktivës, si dhe, në atë që u cilësua si një rast i parë ndërkombëtar, zonën qendrore të retinës, makulën.
Qëllimi ishte të transferohej indi i shëndetshëm nga syri i majtë, i cili nuk mund të komunikonte më me trurin për shkak të dëmtimit të nervit optik, në syrin e djathtë, i cili ruante këtë aftësi, por kishte pësuar dëmtime të rënda strukturore.
Sipas raportimeve, ndërhyrja rezultoi e suksesshme dhe Elena filloi të rikuperojë gradualisht shikimin në syrin e djathtë.
Dr. Reibaldi e përshkroi operacionin si një “maratonë të ndërlikuar kirurgjikale”, duke e cilësuar atë si një hap të ri në kirurgjinë okulistike.
Sipas mjekëve, deri tani nuk ishte realizuar transplantimi i zonës qendrore të retinës në këtë mënyrë.
Megjithatë, specialistët theksojnë se kjo nuk do të thotë se teknika mund të përdoret menjëherë dhe gjerësisht për të gjithë pacientët që kanë humbur shikimin. Bëhet fjalë për një procedurë jashtëzakonisht komplekse, e përshtatshme vetëm për raste shumë të përzgjedhura.
Rasti i Elenës, megjithatë, konsiderohet një zhvillim i rëndësishëm për kirurgjinë rikonstruktive të syrit dhe mund të hapë rrugë për trajtime të reja të humbjes së rëndë të shikimit në të ardhmen.
/vizionplus.tv /
Aktuale.mk
