Përkundër vështirësive të shkaktuara nga Izraeli, mijëra palestinezë shkuan në Mesxhid al-Aksa në Kudsin Lindor të okupuar për të falur namazin e parë të xhumasë të muajit Ramazan, raporton Anadolu Agency (AA).
Mijëra palestinezë që banojnë në Bregun Perëndimor të okupuar kaluan pikat e kontrollit ushtarak midis Bregut Perëndimor dhe Kudsit nga orët e para të mëngjesit dhe u nisën për në Harem-i Sherif.
Ushtarët izraelitë kryen kontrolle të letërnjoftimit dhe vaksinimit në përputhje me udhëzimet e autoriteteve izraelite, të cilat njoftuan se në pikat e kontrollit do të lejonin vetëm 10 mijë palestinezë që kishin marrë vaksinën kundër koronavirusit të ri (COVID-19) të hynin në Kuds nga Bregu Perëndimor për namazin e xhumasë.
Policia izraelite, e cila bllokoi rrugët afër Qytetit të Vjetër të Kudsit Lindor, nuk lejoi të kalonte asnjë automjet tjetër përveç autobusëve.
Pas një udhëtimi të gjatë, palestinezët që arritën në Mesxhid al-Aksa mbushën oborret e Aksasë për namazin e parë të xhumasë në muajin e Ramazanit.
Sipas një deklarate nga Administrata e Fondacioneve Islamike të Kudsit, afërsisht 70 mijë palestinezë falën namazin e xhumasë në Mesxhid al-Aksa.
Në hutben e xhumasë u përshëndetën të burgosurit palestinezë
Ligjëruesi i xhumasë në xhaminë Aksa, Shejh Ikrime Sabri, përshëndeti të burgosurit palestinezë në burgjet e Izraelit me rastin e Ditës së të Burgosurve Palestinezë.
Duke theksuar vështirësitë me të cilat përballen të burgosurit palestinezë në burgje, Shejh Sabriu i bëri thirrje Izraelit të ndalojë shtypjen.
Ai theksoi se policia izraelite preu kabllot e folësve të jashtëm të Mesxhid al-Aksa dhe se Mesxhid al-Aksa u përket vetëm muslimanëve dhe se shkeljet e Izraelit kundër Harem-i Sherifit janë të papranueshme.
Shejh Sabri lavdëroi palestinezët që erdhën në Mesxhid al-Aksa pavarësisht nga vështirësitë e shkaktuara nga Izraeli dhe bëri thirrje që Harem-i Sherifi të mos lihej i zbrazët gjatë muajit të Ramazanit.
– Pas namazit pati turmë
Palestinezët, të cilëve nuk u lejohej të hynin në Kuds në ditë të zakonshme sepse jetonin në Bregun Perëndimor, bënë foto përpara Kupolës së Verdhë në Mesxhid al-Aksa.
Vullnetarët e caktuar nga Gjysmëhëna e Kuqe Palestineze ndihmuan gratë, të moshuarit dhe fëmijët që u prekën nga nxehtësia brenda Harem-i Sherifit.
Pas namazit, ndodhi një grumbullim në portat e Mesxhid al-Aksa për më shumë se një orë.
Ndërkohë, qindra policë izraelitë po prisnin në portat e Mesxhid Al-Aksa dhe në pjesën e brendshme të Kudsit, i njohur si Qyteti i Vjetër.
– Edhe këtë vit nuk u lejuan hyrjet nga Gaza
Teksa Izraeli lejoi që 10 mijë palestinezë nga Bregu Perëndimor i okupuar i rrethuar nga Muri i Ndarjes (Muri i Turpit) të hyjnë në Kuds, edhe këtë vit nuk u lejuan ata që vijnë nga Gaza me një popullsi prej rreth 2 milionë banorë nën bllokadë.
Përgjatë murit prej betoni të lartë 5 metra të ndërtuar në vitin 2003 midis Bregut Perëndimor të okupuar dhe Kudsit ka disa pika kontrolli ushtarake izraelite.
Izraeli nuk i lejon palestinezët nga Bregu Perëndimor të kalojnë në Kuds në ditë të zakonshme, përveç në ditë speciale. Ndërsa ata që jetojnë në Gaza, nën bllokadën e Izraelit, nuk kanë liri të udhëtojnë as në Kuds e as diku tjetër.
Kudsi Lindor dhe Bregu Perëndimor janë nën pushtimin izraelit që nga viti 1967.
