Pas fitores së sigurt të Vladimir Putinit në zgjedhjet presidenciale në Rusi, tashmë po rreshtohen reagimet e Perëndimit, transmeton H1. Një zëdhënës i Këshillit të Sigurisë Kombëtare të Shtëpisë së Bardhë tha se ishte e qartë se zgjedhjet e Rusisë nuk ishin as të lira dhe as të drejta, me Putinin që burgosi kundërshtarët politikë dhe pengoi të tjerët të konkurronin kundër tij.
Ndërkohë, presidenti ukrainas, Volodymyr Zelensky, në fjalimin e sotëm e quajti Putinin një diktator që kërkon pushtet.
“Është e qartë për të gjithë në botë se ky person, siç ka ndodhur shumë herë në histori, është thjesht i sëmurë nga pushteti dhe po bën gjithçka për të sunduar përgjithmonë. Nuk ka asnjë të keqe që ai nuk do të bënte për të vazhduar mbretërimin e tij,” tha ai.
Ndërkohë, Ministria e Punëve të Jashtme polake paralajmëroi se zgjedhjet nuk ishin të ligjshme, të lira dhe të ndershme, duke shtuar se votimi u zhvillua në kushte të represionit të rreptë dhe në pjesët e okupuara të Ukrainës, të cilat shkelin ligjin ndërkombëtar.
Ministria e Punëve të Jashtme gjermane ka njoftuar pasditen e sotme në rrjetin social X.
“Pseudozgjedhjet në Rusi nuk janë as të lira dhe as të drejta, rezultati nuk do të befasojë askënd. Putin sundon në një mënyrë autoritare, duke u mbështetur në censurë, represion dhe dhunë. “Zgjedhjet” në territoret e okupuara të Ukrainës janë të pavlefshme dhe janë një tjetër shkelje e ligjit ndërkombëtar – MPJ gjermane.
Një aleat i liderit të ndjerë të opozitës ruse, Alexei Navalny, Leonid Volkov, hodhi poshtë rezultatet e zgjedhjeve. “Sigurisht, përqindjet e mbështetjes për Putinin nuk kanë asnjë lidhje me realitetin”, theksoi ai.
