Çka nëse nuk arrihet censusi në rrethin e dytë të zgjedhjeve presidenciale? Kryeministri Zaev më herët përmendi ndryshimin e kushtetues, që presidenti të zgjidhjet në kuvend.
Profesori universitar Temellko Risteski, këtë ide e vlerëson si zgjidhje efikase, por sipas tij kjo mënyrë nuk paraqet vullnet të pastër të qytetarëve. Ai tha se nuk është e njëjte kur qytetarët drejtpërdrejtë nëpërmjet votës e shprehin vullnetin e tyre se sa nëpërmjet përfaqësuesve të tyre.
“Kur presidenti zgjidhet nga Kuvendi nuk parashtrohet çështja e censusit siç parashtrohet tani, por megjithatë duke pasur parasysh sovranitetin e qytetarëve është më mirë që presidenti i shtetit të zgjidhet nga qytetarët në zgjedhje të drejtpërdrejta , sepse nëpërmjet zgjedhjeve qytetarët drejtpërdrejtë e shprehin vullnetin e tyre për atë se kush do të jetë i pari i shtetit”, theksoi profesori universitar, Temellko Risteski.
Për t’i motivuar qytetarët që të dalin të votojnë me 5 maj, Ristestki tha se është e nevojshme që të punohet më shumë me qytetarët dhe atyre t’u shpjegohet se zgjedhja e presidentit nga ana e tyre është në interesin e tyre. Gjithashtu ai tha se me këtë lëmë përshtypje të mirë edhe tek vendet anëtare të Bashkimit Evropian.
“Duhet të lëmë përshtypje më të mirë tek miqtë e tanë të BE-së, duhet të lëmë përshtypje se behët fjalë për shtet serioz, qytetarë serioz të cilët mendojnë për të ardhmen e tyre .Duhet t’u shpjegohet qytetarëve se na është hapur rruga për BE dhe se anëtarësimi në BE do të thotë perspektive më të mirë dhe të ardhme më të ndritur”, u shpreh Temellko Risteski, profesor universitar.
Ndryshe në rrethin e parë dalja ishte 41.79%, ndërsa tani në rrethin e dytë kur në garë janë vetëm dy kandidatë, arritja e censusit duket shumë e vështirë. Siç dihet në rrethin e parë 10.58% e votave shkuan për Blerim Rekën, i cili nuk arriti të kalon në rrethin e dytë.
