Marrëveshjes mes Greqisë dhe Maqedonisë së Veriut për hapje të vendkalimit kufitar afër Prespës, javën e ardhshme do të ratifikohet nga Parlamenti grek, pas së cilës do të pasojë edhe vendimi ministror dhe dekreti përkatës presidencial, komunikoi ministrja alternative e Punëve të Jashtme të Greqisë, Anastasia Anagnostopulu gjatë mbledhjes në MPJ-në greke për vendkalimin e ri kufitar, njofton korrespondenti i MIA-s nga Athina.
Në mbledhjen organizuar nga shefja alternative e diplomacisë greke, siç komunikojnë nga Ministria e Punëve të jashtme të Greqisë, kanë marrë pjesë koordinatori i administratës së decentralizuar të rajonit Epir-Maqedonia Perëndimore, Vasilios Mihelakis, zëvendës-prefekti për energji, mjedis jetësor dhe transport në fushën e Maqedonisë Perëndimore, Konstaninos Geru dhe kryetari i Komunës së Prespës, Panajotis Pas’halidis, si dhe përfaqësues të ministrive kompetente.
Ministrja alternative e Punëve të Jashtme të Greqisë, gjatë mbledhjes e ka shprehur kënaqësinë që tregohet rëndësia e Marrëveshjes së Prespës për popullatën lokale dhe u bëri thirrje të gjitha shërbimeve kompetente “në mënyrë më të mirë të mundshme të kryejnë atë që është e nevojshme për zbatimin e marrëveshjes për vendkalimin kufitar”.
Pjesëmarrësit e kanë prezantuar rrjedhën e hulumtimit (ndërlidhje rrugore, objekte ndërtimore për policinë dhe autoritetet doganore dhe ngjashëm), ndërsa është shqyrtuar edhe dorëzimi i propozimit për kyçje drejt Programit evropian INTERREG.
“Siç është caktuar në marrëveshje, në afat prej 30 ditëve të ratifikimit, do të formohet Komiteti i përzier i ekspertëve për zbatim të marrëveshjes, në të cilin do të marrin pjesë përfaqësues nga Greqia dhe Maqedonia e Veriut”, kumtojnë nga MPJ-ja greke.
Në mbledhje është theksuar se hapja e vendkalimit kufitar është kërkesë afatgjate e pushtetit lokal të Prespës, të mbështetur nga komuna dhe periferia kompetente për përparimin e rajonit më të gjerë dhe për zhvillimin turistik.
