Presidenti Kosovws Hashim Thaçi ka thënë se Presidenca ka dorëzuar në Gjykatën Kushtetuese argumentet e saj lidhur me dekretin për mandatimin e Avdullah Hotit të LDK-së për kryeministër të vendit.
“Theksoj se që qenësore për demokracinë në Kosovë është që Gjykata Kushtetuese të punojë e pavarur, pa presione nga cilado palë. Askush nuk mund ta bllokojë vendin dhe institucionet e shtetit dhe për këtë arsye ftoj të gjithë që t’i kontribuojmë forcimit të institucioneve dhe rendit”, është shprehur Thaçi, njofton Klan Kosova.
“Të gjithë duhet ta respektojnë procesin elektoral të 6 tetorit 2019, të respektojnë Kushtetutën dhe ligjet e vendit. Askush nuk ka të drejtë të pretendojë të mbajë të uzurpuar asnjë zyrë të institucioneve të vendit në veçanti pas vendimeve të kuvendit”.
Thaçi ka pohuar se vendimi i Kushtetueses nuk duhet të paragjykohet.
“Askush nuk e di cili do të jetë vendimi i Gjykatës Kushtetuese. Askush nuk duhet të paragjykojë se si do të jetë ai vendim. Të gjithë duhet punuar me kulturën më të lartë, askujt nuk i ndalohet komentimi por e kemi obligim ta respektojmë vendimin e Gjykatës Kushtetuese edhe unë si president”.
Thaçi ka theksuar se askush nuk do të mund ta destabilizojë shtetin.
