Zjarret: “Air Tractor” mbi Graçan, në Sellcë kapen prerës ilegal të drunjëve
Ekipet zjarrfikëse vazhdojnë ndërhyrjet në disa pika kritike në Maqedoninë e Veriut. Zjarri në rajonin e Shtipit është vënë pjesërisht nën kontroll, por në terren vazhdojnë të ketë vatra aktive. Ndërkohë, zjarri që gjatë natës hyri nga territori i Kosovës është përhapur mbi fshatin Graçan.
Në shuarjen e zjarrit mbi Graçan janë përfshirë dy avionët “Air Tractor” të Drejtorisë për Mbrojtje dhe Shpëtim. Vija e zjarrit është më e gjatë se pesë kilometra dhe paraqet rrezik për fshatin. Në terren ndodhen edhe zjarrfikësit e Shkupit, ndërsa ndërhyrja ajrore synon ta pengojë afrimin e flakëve drejt zonës së banuar.
Në rajonin e Lakavicës, ndërmjet Puhçes dhe Sellcës, era e fortë shkaktoi përhapjen e shpejtë të zjarrit drejt një lagjeje me shtëpi pushimi. Zjarrfikësit arritën t’i mbrojnë objektet dhe nuk raportohet për persona të lënduar.
Megjithatë, një degë e zjarrit në drejtim të Sellcës dhe malit Serta vazhdon të mbetet kritike. Ekzistojnë dyshime të bazuara në dëshminë e një personi se zjarri mund të jetë shkaktuar qëllimisht. Për rastin është njoftuar policia e Shtipit, por shkaku ende nuk është konfirmuar zyrtarisht.
Në afërsi të zonës së zjarrit janë kapur edhe tre persona duke prerë dru ilegalisht. Informacionin e bëri të ditur zëvendësdrejtori i NP “Pyjet Kombëtare”, Kire Mihajllov.
Autoritetet theksojnë se nuk ka prova që këta persona të jenë të lidhur me shkaktimin e zjarrit. Prerja ilegale e druve dhe hetimi për origjinën e zjarrit trajtohen si raste të ndara.
Nga 1 deri më 2 shtator, deri në orën 07:30, në vend janë regjistruar gjithsej 41 zjarre në hapësirë të hapur. Gjashtë ishin aktive, pesë nën kontroll, ndërsa 30 ishin shuar. / Aktuale.mk
