Duke u përgjigjur pyetjeve të qytetarëve kandidati për president nga radhët e LSDM-së Stevo Pendarovskit tha se nga imazhi i Hristijan Mickoskit mund të shohim personalitetin e Nikolla Gruevskit.
Pendarovski kështu tha nga tubimi i mbrëmshëm me qytetarë në lagjen Aerodrom të Shkupit.
“Kemi 33 vjet që jemi shtet i pavarur, mantra e çdo politikani nuk është vetëm në zgjedhje që gjyqësori duhet të jetë i pavarur, gjyqtarët duhet të jenë të pavarur, të gjykojnë vetëm në bazë të Kushtetutës, ligjit, marrëveshjeve ndërkombëtare. E Mickoski thotë në vitin 2024 “do të hetojmë, do ta hetojmë pronën e tij, do ta kontrollojmë ose do ta arrestojmë”. Nuk arrij ta kuptoj nëse është kandidat për kryeministër apo kandidat për gjyqtar, prokuror. Si mundet ti si politikan të shpallësh arrestimin e dikujt?”, pyeti Pendarovski.
Pendarovski iu referua edhe ofertës së kundërshtares së tij Gordana Siljanovska-Davkova.
“Kam treguar se programi im është më i mirë se i saj në 2019 kur fituam zgjedhjet. Nëse programi i saj do të ishte më i mirë, ajo do të kishte fituar zgjedhjet. Dhe tani ka një ndryshim tjetër midis programit tim dhe të saj. Programi i saj është i padukshëm, ajo është zhdukur. Klikoni në internet dhe më tregoni ku është programi i saj? E imja është e dukshme, e saja është e padukshme, kështu që nuk mund të krahasojmë diçka që ju shihni dhe diçka që nuk është aty, që është iluzion”, tha Pendarovski.
Kandidati për president Pendarovski para të pranishmëve tha se ka arritur pothuajse gjithçka që ka premtuar pesë vjet më parë, duke shtuar se prioritet kryesor në mandatin e ri do të jetë vetingu i plotë i njerëzve në gjyqësor, por edhe në politikë.
“Duhet të pajtohemi dhe tash e tutje të japim një premtim publik se nëse marrim besimin tuaj, detyra jonë e parë duhet të jetë një verifikim i thellë dhe gjithëpërfshirës i të gjithë gjyqtarëve dhe prokurorëve, por edhe neve politikanët”, tha Pendarovski.
Para qytetarëve, Pendarovski bëri thirrje që më 24 prill të votohet për numrin 1 dhe më 8 maj të vërtetohet fitorja dhe shteti të ecë përpara.
