Nata e dytë me trazira kaloi në qytetin Mineapolis të Shteteve të Bashkuara, ku policia qëlloi për vdekje një afrikano-amerikan.
Shefi i policisë së qendrës Bruklin, Tim Gannon, tha se policja aksidentalisht qëlloi dhe vrau 20-vjeçarin Daunte Wright, pasi nxori pistoletën në vend të armës me elektroshok.
Policia publikoi pamjet e kamerave nga incidenti i 11 prillit, ku shihet se Wright ndalohet për një shkelje trafiku dhe pastaj pason përleshja me policinë.
Kur oficerët përpiqen ta prangosin Wrightin, ai përpiqet të ikë me makinë.
Një police grua dëgjohet duke thënë: “Në djall, e kam qëlluar”, por fillimisht dëgjohet duke kërkuar armën me elektroshok.
“Oficerja nxori pistoletën në vend të armës me elektroshok”, tha Gannon në një konferencë për shtyp.
“Ishte një shkrepje aksidentale që rezultoi me vdekjen tragjike të Wrightit. Nuk mund të them asgjë për të zvogëluar dhimbjen e familjes së tij”, tha Gannon.
Policja u identifikua më vonë si Kim Potter, e cila ka punuar për policinë e qendrës Bruklin për 26 vjet.
Incidenti shkaktoi protesta për të dytën natë me radhë, me gjithë orën policore dhe gjendjen e jashtëzakonshme, të shpallur nga autoritetet.
Policia hodhi gaz lotsjellës dhe plumba gome për t’i shpërndarë turmat, disa prej të cilave plaçkitën dyqanet. Sipas mediave lokale, rreth 20 biznese u thyen.
Forcat e sigurisë gjatë protestave në Mineapolis.
Presidenti i Shteteve të Bashkuara, Joe Biden, tha se vrasja është “tragjike”, por paralajmëroi kundër trazirave të dhunshme, të tilla si ato që përfshinë SHBA-në vitin e kaluar, pas vdekjes së afrikano-amerikanit George Floyd në duart e një polici në Mineapolis.
“Mendoj se duhet të presim dhe të shohim se çfarë tregojnë hetimet”, u tha Biden gazetarëve.
“Ndërkohë, dua ta bëj të qartë sërish: nuk ka absolutisht asnjë justifikim, asnjë, për plaçkitje. Protestat paqësore janë të kuptueshme”, shtoi ai.
Më vonë, Biden shkroi në Twitter: “Sot mendoj për Daunte Wrightin dhe familjen e tij, si dhe për dhimbjen, zemërimin e traumën që Amerika me ngjyrë përjeton çdo ditë”.
“Derisa presim një hetim të plotë, ne e dimë se çfarë duhet të bëjmë për të ecur përpara: të rindërtojmë besimin dhe të sigurojmë përgjegjësisë, në mënyrë që askush të mos jetë mbi ligjin”, tha presidenti amerikan.
Today I’m thinking about Daunte Wright and his family — and the pain, anger, and trauma that Black America experiences every day. While we await a full investigation, we know what we need to do to move forward: rebuild trust and ensure accountability so no one is above the law.
— President Biden (@POTUS) April 12, 2021
Nëna e Wrightit, Katie, tha se zemra e saj “është ndarë në njëmijë copa”.
Ngjarjet në Mineapolis vijnë në kohën kur një ish-oficer i policisë së këtij qyteti po gjykohet për vrasjen e Floydit, gati një vit më parë.
Floyd, 46 vjeç, u vra gjatë arrestimit majin e kaluar. Incidenti shkaktoi protesta në të gjithë SHBA-në kundër brutalitetit të policisë.
Polici Derek Chauvin përballet me akuza për vrasje dhe vrasje pa paramendim.
Chauvin u pa në një video duke shtypur Floydin me gju në qafë, për më shumë se nëntë minuta, derisa Floyd vazhdimisht thoshte se nuk mund të marrë frymë./REL
